‘Un dia pa nunca lubida’


Diabierna ultimo, 23 oktober Juliana School MAVO a para keto na conscientisacion di cancer na pecho. Un diabierna cu mundialmente ta conoci como ‘Pink Friday’ unda hende ta bisti na ros pa asina demostra respet na esnan luchando contra e malesa di cancer na pecho. 

Juliana School MAVO, a probecha di e fecha aki pa crea conscientisacion. Mayoria alumno y personal a participa y a bisti na ros. Un bunita dia unda a invita un pashent di cancer na pecho pa a bin duna su testimonio. 

Testimonio

Sra Myandra Croes a conta su storia den lokaal 10, y e otro klasnan por a wak esaki ‘live’ den otro lokaalnan via ‘google meet’.

Alumnonan a keda impresiona cu Myandra su storia y hopi a admira su curashi y positivismo. Myandra a splica e importancia di educa nos muchanan desde jong tocante e topico aki y a pone enfasis cu deteccion na tempo por salba bo bida. Myandra a educa alumnonan tambe tocante cancer na pecho fase 4,  di cual hopi no tabata sa di esaki. Na final Myandra a ricibi un regalo di parti scol como muestra di aprecio. Juliana School ta gradici Myandra y ta dese’e forsa pa sigui cu e lucha.

Donacion

Tambe den pauze a haci donacion na Koningin Wilhelmina Fonds Aruba. 

A bin cu e bunita iniciativa pa bende feter ros na scol pa AFL 1,- pa asina alumnonan por yuda na un bon causa. E meta a wordo cumpli; tur feter a wordo bendi. Tabata bunita pa wak hopi alumno ta cana rond cu nan feter ros na nan keds. Mas bunita ta cu a logra sera un bunita suma pa e fundacion. Sra Lilly Prince, presidente di Koningin Wilhelmina Fonds Aruba tabata presente pa ricibi e donacion y a keda contento y agradecido. Sra Lilly a splica cu door di e situacion di covid-19, nan como fundacion tambe ta sintie y p’esey ta aprecia cada donacion.

Juliana School ta haya necesario pa siña muchanan desde chikito e importancia di yuda y pa nan compronde e balor di nan florin. Un florin por haci un diferencia.

Juliana school MAVO ta manda un peticion na comunidad di Aruba pa purba keda haci donacion na e fundacionnan pa nan por sigui yuda nan clientenan y ta desea tur pashent di cancer di pecho forsa y pronto recuperacion. 

©2020 by Bo Informado