Ta proyecta un crecemento economico di 5,6% pa aña 2021

Situacion di pandemia ta pone cu cifra por cambia


Oranjestad – Durante e conferencia di prensa di Minister Maduro, e mandatario a amplia riba e perspectiva economico pa aña 2021 na man di e proyeccion economico haci pa Departamento di Asuntonan Economico, Comercio y Industria (DEZHI), cu ta proyecta un crecemento economico di 5.6% pa aña 2021.


Economia a contrae cu 32.7% den 2020

E efectonan di e pandemia mundial tabata tin un impacto grandi riba economia di Aruba den 2020 y lo sigui afecta nos den 2021. E grado di incertidumbre pa e impacto den 2021 ta grandi locual ta haci e proyeccion economico pa 2021 uno basta dificil. Asina mes Departamento di Asuntonan Economico DEZHI, haciendo uso di e modelo macroeconomico MARUBA a traha un pronostico pa e crecemento di nos Producto Interno Bruto (GDP) pa 2020 y a proyecta 3 scenario pa 2021 basa riba expectativa den crecemento den turismo. Pa 2020, e pronostico ta indica cu economia di Aruba a contrae cu 32.7 % den termino nominal den 2020 compara cu 2019. E reduccion aki ta wordo causa principalmente door di e efecto di e ‘lockdown’, e 'shelter in place' y consecuentemente e reduccion den cantidad di turista cu a bishita nos isla den 2020. Adicional, diferente inversionnan cu tabata planea pa 2020 a haya retraso y a wordo posponi. Esaki tabata tin efecto riba consumo, exportacion y importacion cu ta e motornan di crecemento economico cu e resultado cu economia a contrae cu 32.7% den 2020.

Ta premira un crecemento economico di 5.6% den 2021

Pa 2021 a scohe pa usa 3 scenario pa pronostica e crecemento economico di nos Pais cual ta basa principalmente riba expectativa di crecemento den turismo den 2021. Den e scenarionan pa 2021 ta tene cuenta cu un crecemento leve den inversion, esaki debi na e incertidumbre rond di e situacion di COVID-19 den mundo y na Aruba. E scenario 'conservativo' pa 2021 ta asumi un crecemento economico di 0.6 % den termino nominal. E scenario 'cauteloso optimista' ta indica un crecemento nominal di 5.6 % y e scenario 'optimista' ta mustra un crecemento nominal di 8.5 %. Esaki kiermen cu Departamentodi Asuntonan Economico DEZHI ta premira a base di informacion disponibel te cu november 2020, cu e crecemento economico den 2021 lo ta entre un 0.6 % y un 8.5 % di GDP. Como base pa e crecemento economico den 2021 ta opta pa usa e scenario 'cauteloso optimista' cu ta premira un crecemento di economia di Aruba cu 5.6 %.

Situacion di pandemia ta pone cu cifra por cambia

Pa motibo di e rapidez cu cual e situacion di tanto mundo como na Aruba ta cambia dia pa dia door di e pandemia, e ta dificil pa haci proyeccion cu un nivel halto di certidumbre. Pa e motibo aki e proyeccion di crecemento economico di nos GDP pa 2021 lo por cambia. Departmento di Asuntonnan Economico DEZHI lo keda monitoria e datonan den transcurso di 2021 pa asina adapta e cifranan riba base regular. E perspectiva economico pa 2020-2021 ta disponibel bou e nomber Economic Outlook 2020-2021 riba e website di Departamento Economico DEZHI na www.deaci.aw. E mandatario a gradici e ehecutivonan di DEZHI cu a base di informacion disponibel a traha riba e documento di Economic Outlook 2020-2021.

2 views0 comments

©Bo Informado