Studiantenan di EPI aportando na campaña di vacunacion COVID-19



ORANJESTAD – Un grupo di studiante di Colegio EPI su unit Salubridad & Servicio actualmente ta dunando nan aporte na e campaña nacional di vacunacion contra COVID-19.

E studiantenan ta den e ultimo añَa di nan estudio na Colegio EPI caminda nan ta preparando pa nan futuro profesion den cuido di salud, cu un periodo di practica cu ta parti esencial di un MBO-opleiding.

Bou di guia di e profesionalnan di DVG, nan ta staciona na e prikpost na Santa Cruz. Eynan nan ta traha den un team di asina yama “trekkers” y “prikkers”, caminda cu e trekker ta yena e inyeccion cu e liquido di e vacuna contra COVID-19, y e prikker ta suministra e inyeccion na cada persona.


Naïr Kelly, studiante di examenjaar di e opleiding Verpleging Niveau 4, ta fungi como zorgcoördinator na e prikpost aki. El a cuminsa cu su stage na DVG aña pasa, net prome cu e pandemia di COVID-19 a cuminsa na Aruba. Durante e periodo aki el a haya un bon preparacion practico y a gana hopi experiencia, y aworaki e por guia su colega studiantenan. Jaylee Gutierrez, Kendra Regis, Jealine (Samantha) Rivera y Shariënne Winterdaal ta studiantenan di e opleiding Verpleging, mientras cu Angelica Diaz y Ralaquecha Joseph ta studiante di Verzorging. Hunto nan ta haciendo un diferencia den e lucha contra COVID-19 y na mesun tempo nan ta haci nan stage, cual lo hiba nan mas cerca di tin nan diploma den nan man. Na fin di cada siman nan ta bin campus di Colegio EPI pa asina raporta nan nan mentor, Sra. Myloushka Wernet-Burleson, pa sigura cu tur cos ta canando bon.


Colegio EPI ta sumamente agradecido na DVG cu a brinda e studiantenan e oportunidad pa pone loke nan a siña den practica. Nan a ricibi instruccion y training di parti di e profesionalnan di DVG pa asina cumpli cu tur e rekisitonan stipula. Tambe nos ta hopi orguyoso di por conta cu e confiansa di DVG den e preparacion cu nos ta duna nos studiantenan, reiterando cu Colegio EPI como institucion di educacion y su programanan tin un balor inmenso pa nos comunidad, caminda cu nos meta principal ta pa forma profesionalismo y personalidad.

Riba e potretnan adhunto por aprecia:

1. Di robes pa drechi: Jealine Rivera, Kendra Regis, Angelica Diaz, Jaylee Gutierrez y Naïr Kelly na prikpost na Santa Cruz.


2. Kendra Regis y Jealine Rivera preparando e inyeccionnan.


3. Shariënne winterdaal suministrando e vacuna contra COVID-19


4. Di robes pa drechi: Jaylee Gutierrez, Kebdra Regis, Jealine Rivera, Shariënne Winterdaal, Angelica Diaz y Ralaquecha Joseph den praktijklokaal na Colegio EPI.

2 views0 comments

©Bo Informado