Situacion na GNC ta debi cu frontera di Venezuela ta cera.




Ilegalnan cu ta kedando na Guarda nos Costa na Sabana Berde a dicidi di protesta diamars merdia contra esunnan cu ta cuidanan. Di parti Guarda nos Costa mester a pidi refuerzo di polis pa bin yuda nan cu e situacion pasobra algun di nan a dicidi di subi dak di e edificio pa asina haya atencion riba nan mal contento.


Directora di Guarda nos Costa Sra. Trudy Hassell a sali papia cu prensa riba e situación cu a presenta unda e la splica cu rond di 1’or di merdia ta drenta información cu un grupo di un cel ta kibrando porta di e cel y na e momento ey ningun cuidado por a splica pakico nan ta haciendo esey. Despues Sra. Hassell ta haya notificacion cu e personanan a cuminsa lanta cu e cuidadonan. Motibo di nan protesta pasobra a saca un par di matras cu tabatin di mas den e celnan y a splica nan cu mester di e matrasnan pasobra tin mas persona ilegal cu ta bay drenta GNC y cu no tin mas.


E personanan aki no a keda contento cu esey di cual algun di nan a uni y cuminsa haci desorden. Actualmente tin falta di personal na GNC pero asina mes diariamente e hendenan aki ta haya espacio pa recrea y sali tuma aire pero no ta tur ora esaki ta e caso pamotibo cu algún di nan mester di atención di dokter cu un cuidado acerca y debi cu tin falta di personal no ta tur cos ta logra manera kier. Na GNC actualmente no por duna duna tur hende mei ora pa haci yamada na nan famia pasobra asina por asina ta bay keda di mainta tempran te 12’or di anochi ocupa cu e detenidonan y naturalmente esey no por.


Na GNC tin un programa diario pa tur hende y mester por cumpli cu esaki y hasta pa e momento cu tur mester come. Sra. Hassel a splica cu no ta tur ilegal ta esunnan cu a drenta como turista y a keda pero tambe tin un grupo grandi cu a bin for di KIA después cu nan a sinta nan sentencia y tambe tin un grupo grandi cu a drenta clandesinamente cu boto. Conforme cu maneho no sa kende e hendenan aki ta y no sa tampoco kico ta nan background y nan no ta permiti pa haya meldplicht.


Directora di GNC tambe a splica cu tur dia diligentemente ta evalua casonan ta cua persona por haya melplicht, pero tin algun hende cu a yega di duna nan meldplicht y nunca mas nan a bay meld na GNC. Tin hende cu a sali cu garantia y e garantenan mes ta revoca e garantía di nan y nunca mas ta haya sa unda e personanan aki ta pasobra nan no ta bin meld. Di parti GNC hopi biaha ta mustra e buena fe y kere den e persona pero hopi biaha ta keda defrauda den esey. Tambe ta evalua caso pa caso pasobra cada caso ta diferente na otro pa asina por saca conclusion kende por duna meldplicht.


E situacion awor aki ta, cu frontera di Venezuela ta cera y ta dificulta e situación cu no por deporta e ilegalnan. Den caso di detenidonan cu a sali di KIA y cu a comete crimen no por duna nan meldplicht y ni tampoco esunnan cu a drenta Aruba clandestinamente cu boto pasobra no tin conocemento di nan pasado. E personanan aki no por bay den comunidad y e solucion no ta pa habri porta y laga tur hende bay pasobra GNC tin responsabilidad hopi grandi riba mantencion di orden publico y naturalmente mester proteha e pueblo.


E situacion aki no tin nada di haci cu gobierno pero cu pais Venezuela cu ainda no a habri e posibilidad pa e personanan aki regresa nan pais. Tanten cu esey no sosode Aruba ta pega cu e situación aki. For di basta tempo ta trahando pa haya mas personal y Minister Bikker tambe ta trahando riba dje pa haya mas personal pa haci e trabou mas sigur cu loke ta haciendo awor. Ta tur dia Sra. Hassell ta comunica cu consulado di Venezuela y e contesta no ta yega y tur dia e ilegalnan kier tende esey for di dje.


Siman pasa ainda Sra. Hassell a pidi consulado bin papia cu e Venezolanonan riba nan peticion na GNC, pero te ainda no tin ningún contesta cu e lo bin. Sra. Hasssell ta lamenta e situación y ta comprende e ilegalnan pasobra no ta un situación fácil y hopi di nan tin famia na Venezuela y ta preocupa pa nan famia. Actualmente ta deal cu e situación y ta trata di haci nan estadia na GNC mas agradabel posibel. Si tin miedo debi na Covid, tur hende cu ta cera na GNC ta Covid free, pasobra a bin cu medida for di tempo cu Covid a cuminsa pa grantisa salud di un y tur.


No solamente di e ilegalnan pero tambe di e personal di GNC. Directora di GNC ta haya cu violencia no ta logra nada y único manera ta, pa mantene hopi pasenshi. Pronto lo bay haya mas personal y tambe sigura e edificionan di GNC. E preocupación di Sra. Hassell ta seguridad di e personal pero e ta kere cu hunto mester bay busca un solución, Na Guarda nos Costa tin regla pa tur hende y nan mester comportanan mes bon y nechi.

1 view0 comments

©Bo Informado