SAN NICOLAS MESTER DI ATENCION DEBIDO Y NO PROMESANAN FALSO!


Dialuna 12 di april 2021 a tuma lugar apertura oficial di e 22 camanan na ImSan cu lo permiti un patient keda drumi un dia. Mi persona a haya hopi felicitacion pa cual mi ta hopi agradecido. Cu e debido respet mi kier a reacciona riba e projecto aki toch.


E projecto NO tabata un capricho, sino un vision di mi persona pa comberti e centro medico Rudy Englebrecht den un facilidad medico super moderno, cu lo por a scapa bida di nos hendenan. Na 2000/2001 mi antesecesor dr. Ike Posner, a laga haci un "gezondheidsonderzoek" grandi na Aruba. For di e investigacionaki a sali afo, cu e causa mas grandi di mortalidad na Aruba ta problemanan cardiovascular pa motibo di entre otro sobrepeso di nos hendenan. Mirando e hecho cu gobernacion ta un continiudad nos a haci un analisis di e raport y nos a yega na e conclusion cu lo ta necesario pa implementa un solucion "holistico" cu ta acapara e problematica den su totalidad.

Aki a nace e idea pa bin cu e "one-shop-medical-facility"! Na 2004 nos a cuminsa cu e prome fase, financia dor di FDA , mientras cu for di propio prosuepusto a cuminsa cu e dos fase na 2007.

E proyecto den su totalidad mester a contene: 2 cat-lab, 2 OK, 5 ICU, 6 MCU, 22 cama, Laboratorium, Radiografia, Huisartsenpost, Wondenpoli, Verloskamer, Poli pa dokter di wowo, EHBO, Ambulance Zorg, Dialyse y por ultimo un Diabetes-centrum. Un scala di servicio medico, na unda e aspecto di PREVENCION lo tabata tin un lugar prominente.

Lastimamente for di prome dia cu e gobierno di AVP a sinta, un boycot feroz a tuma lugar. Pa un capricho infantil a scohe pa bai cu den un aventura cu Baptist na Miami. Ta interesante pa sa cuanto e aventura aki a costa nos pueblo. Dicon no a haci uso di TUR e aparatonan cu tabata tey caba? Unda e dos catheterization labnan a bay? Unda e 5 ICU's y e 6 MCU's a bay? Dicon dr. Rajnherc no ta bisa pueblo esey? Ta ken e kier proteha? Btw e 22 camanan cu a ser pone den uso, tabata t'ey for di aña medio 2009 caba!! Dicon a core cu tur e dokternan di cas for ImSan?


Como un mandatario responsabel mi a continua e maneho anterior, pasobra esaki tabata lo corecto. Mi a usa e informacionnan di e "gezondheidsonderzoek" y comberti esaki den Vision. Lamentabelmente esaki a wordo boycotea.

E tipo di continuacion di e boycot nos por a mira den e "verslavingszorg". Na fin di 2001 mi a sigui cu e maneho di mi antesecesor sr. Watty Vos cu tabata basa riba e principio di e "zandlopermodel"! Na fin di 2009 a deshaci di esaki y na 2017 a sigui cu e maneho deficiente di e gobierno anterior. Pa loke ta e parti di Medio Ambiente exactamente igual. Na mei 2001 ex-minister Tico Croes a firma un contract pa fase 1 pa cuminsa soluciona e problema di Parkietenbos y mi a sigui cun'e. Na mei 2002 ya nos a paga e candela riba Parkietenbos y nos a cera e 2 otro dumpnan. Na fin di 2009 atrobe un boycot feroz a tuma lugar y pa colmo e gobierno POREDmep a corona e boycot aki ora cu a desmantela e planta di Bouldin & Lawson na 2019!

Mi ta sumamente contento, manera e director di ImSan mes a bisa, cu loke ta ser haci awendia na ImSan ta algo hopi simpel, vooral si compare cu e facilidad medico super moderno cu mi persona a laga atras, mi ta hopi orguyoso cu a inicia cu e idea aki. Mi ta keda cu e soño cu na San Nicolas tin lugar pa un hospital "full fleched" na unda operacionnan grandi por ser haci cu nos hendenan. Mescos cumi a traha como minister na San Nicolas y mi a laga traha un edificio di SVB na San Nicolas. Ta den man di pueblo si nan lo duna nos e oportunidad pa haci e soño aki y hopi mas bira un realidad atrobe, cu a ser stroba dor di tanto e gobierno di AVP como e gobierno POREDmep. San Nicolas sigur merece mihor!

7 views0 comments