Resultado di aña 2018 tabata pio cu 2017


Diabierna ultimo Parlamento di Aruba a trata cuentanan anual di Pais Aruba pa añanan 2016 te cu 2018. “Algo inusual”, segun Parlamentario Richard Arends (AVP), mirando cu esaki ta di dos biaha cu e cuenta anual di aña 2016 ta wordo presenta y ta spera cu e biaha aki si e lo conta cu sosten di mayoria di sala. “Pa e fechanan aki Parlamento di Aruba supuestamente mester ta ta tratando e cuenta anual di aña 2019, pero for di aña pasa a surgi un kiebro den e ciclo di duna cuenta.”


E deficit di aña 2014 tabata 9.4% pa motibo di un transferencia di 140 miyon di florin cu a haci na e fondo di pensioen APFA combina cu aumento di edad di pensioen pa asina salvaguardia e pensioen di empleadonan publico. “For di aña 2014 a sa di cumpli cu e normanan presupuestario stipula den e ley di supervision financiero y a culmina cu un deficit di 0.5% na 2017: esaki ta un reduccion di casi 500 miyon den tres aña,” Parlamentario Arends a splica.


“Nos por corda cu na luna di december 2017 – despues di un luna cu e gabinete nobo a sinta – a aumenta e deficit artificialmente cu 130 miyon florin cu consentimento di CAFT. A dicidi di schuif cierto pagonan di dividendo di empresanan estatal cu mester a drenta na 2017 pa aña 2018, a hasi gastonan di renobacion di Bestuurskantoor y kier a cubri un deficit adicional pa AZV siendo cu no tabatin un cuenta anual di AZV ainda mes. Den un luna di tempo a laga e resultadonan di aña 2017 mustra mas malo cu ta posible y a crea espacio financiero di 130 miyon pa por hasi gastonan cu no tabata presupuesta inicialmente,” Parlamentario Arends a splica


Den un carta fecha 14 di januari 2020, Gobierno di Aruba ta confirma na CAft cu Aruba ta cumpliendo cabalmente cu e normanan ancra den e ley di supervision financiero for di 2015, como tambe hecho cu e debe nacional nunca a yega 90% manera cu e wordo propaga localmente. “Introduccion di un serie di medida for di 2018, inclusive e aumento di BBO bou capa di un crisisheffing temporario, ta totalmente infunda,” Parlamentario Arends a sigui bisa. “Ta di lamenta cu na aña 2017 a maniobra entradanan y gastonan di Pais pa asina laga e cuadro financiero mustra mas malo cu ta posible, pero creando espacio pa fia 130 miyon florin extra.”


Segun e normanan di e ley di supervision financiero presupuesto di aña 2018 mester a conta cu un surplus caba di +0.5%. Sinembargo, CAft a duna Gobierno espacio pa mantene e deficit di aña 2018 mescos cu esun di aña 2017. Segun Arends, su bo tuma e dos añanan aki pareu, bo ta crea un espacio financiero gigante di 300 miyon florin. “Esaki tabata e posicion financiero di salida real di e gabinete actual.”



2 views0 comments

©Bo Informado