Reglanan estricto di corona virus ta conta pa pueblo pero no pa Prome Minister


Tur cos ta mustra cu reglanan cu tin na vigor na e momentonan aki, impone pa gobiberno pa combati corona virus, ta parce di ta conta solamente pa pueblo y no pa Prome Minister Evelyn Wever Croes.

Arthur Dowers, miembro di fraccion di AVP den parlamento, a mustra cu motibo di e observacion aki, ta pa e hecho cu for di den comunidad, a ricibi cantidad di reaccion for di den comunidad, caminda ta wordo punta ta con bin Prome Minister ta canta crisis, ta pidi pueblo pa keda paden pa no plama e virus aki, ta bira bula bay Miami, Merca, caminda henter mundo sa cu e situacion eynan ta hopi serio.

“Mesun Minister Presidente Evelyn aki, ta simannan largo a bin ta papiando di cu pueblo mester tin mas disciplina , pueblo tin cu tuma e virus aki hopi na serio y tur hende keda paden pa cuida nan curpa y cuida otronan tambe.

Tin reaccionnan cu tambe a bin dilanti riba medionan social caminda ta bisa cu Minister Presidente tin derecho di bay cu vacacion pero como miembro di Parlamento, como representante di pueblo, ta mi obligacion di cuestiona e asunto aki.

Mientras cu Prome Minister ta bin practicamente tur dia den conferencia di prensa, ta canta crisis, ta bisa pueblo cu tin hopi cos di haci na Aruba, ta bula bay Miami caminda e ta keiro, gosando di atraccionnan cu tin y ta bailando rond, mustrando cu reglanan di corona virus, ta conta solamente pa pueblo y no pa su persona.

Ta mi derecho y obligacion pa bin dilanti cu e situacion aki cu ta bibando den pueblo, kendenan ta sinti nan mes engaña dor di Minister Presidente, ya cu mesun Evelyn Qwever Croes aki algun dia atras a bin dilanti y dal tur hende c’un toque de queda, mandando henter pueblo 10’or di anochi paden di nan cas.

Awor tur hende ta puntrando con por ta cu Evelyn pa manda tur hende isola nan mes den nan cas durante toque de queda pero di otro banda e mes ta subi avion bula bay Miami y aki tin cu puntra si su persona tambe ta drenta su camber na Miami 10’or di anochi, of si su persona si ta fiesta, baila y djodjo henter anochi?

Pregunta cardinal aki ta e hecho cu Prome Minister a biaha pa un teritorio cu tin mucho mas caso di corona virus cu Aruba, mientras cu apesar cu e cantidad di casonan ta bahando aki na Aruba y ta algo di gradici pueblo pa su coperacion.

Realidad di e asunto ta cu gobierno ta dunando conseho pa no biaha bay un caminda si no tin necesidad urgente, manera pa motibo di malesa of trabou tin cu biaha y pa no biaha pa teritorionan cu tin hopi caso di corona virus y kico Evelyn como Minister Presidente y presidente di e crisis team ta bira haci, ta lanta bela bay hunto cu henter su famia pa Miami camidna tin hopi caso di corona virus.

Ta di di lamenta profundamente ta cu su persona a perde sinti pa pueblo, ya cu si Evelyn tin sentimento pa pueblo y ta mira cu pueblo ta den sufrimiento, cu pueblo no tin cuminda, cu pueblo no tin forma di move, caminda hopi hende ta perdiendo nan propiedadnan, caminda tin beslag ta wordo pone riba propiedad di pueblo.

Aki tin puntra con un Prome Minister bou di e circunstancianan ey, ta bira bandona e pais cu e mes ta bisa cu tin un crisis sumamente grandi, cu tin sumamente hopi trabou pa yuda pueblo, anto bo ta bandona e pais lagando tur hende den un situacion di incertidumbre.

E cos aki ta mustra y ta un confirmacion cu tur loke e señora aki a bin ta bisando pueblo pa algun tempo aki, ta gañamento ya cu e señora aki riba su facebook a mustra cu tur diadomingo e ta na un otro beach gosando y si su persona ta haciendo esaki, ta mescos cu stimula henter pueblo pa nan bishita beachnan, pa nan bay fiesta.

Kico e resultado die mal ehempel aki di Prome Minister, ta cu pueblo tambe a lanta bay beach pa haya alivio di e presion cu nan ta bibando aden pero ta bin resulta cu pueblo a bin haya su mes den problema cu polis, a ricibi multa pa motibo cu nan a haci nan mes culpabel na samenscholing.

Pues fuera di ta duna mal ehempel y Evelyn mes ta bisa cu e tin cu traha asina duro cu su persona no ta sosega, pero awor ta bira haci algo cu ta mustra cu en berdad e no tin mucho trabou, cu e mes no ta tuma e crisis aki na serio y ta bula bay un luga caminda tur dia por lesa cu miyones di caso cu tin na Merca, miles y miles di hende ta muri confirmando cu reglanan cu su gobierno mes ta imponiendo riba pueblo, no ta conta pa su persona,” Parlamentario Asrthur Dowers a declara.



28 views

©2020 by Bo Informado