Pueblo di Aruba lo keda recorda Hildward pa su gran aporte na musica y cultura di nos Pais Aruba


Oranjestad – Minister Xiomara Maduro tabata presente na e ceremonia di desvelo di Caya Hildward Croes y den su discurso a expresa su gratitud cu un otro caya na Aruba por hiba nomber di un di nos baluartenan riba tereno musical. Sr. Hildward Croes den felis memoria ta un di nos musiconan cu mas a destaca den su trabou tanto na nivel nacional como na nivel internacional.

Hildward tabata un musico cu a obtene su Master Degree in Music y tabata nomina tres biaha pa e prestigioso premio Grammy Awards. Hildward a traha cu bandanan grandi manera Wilfrido Vargas, Juan Luis Guerra y su 440, Chichi Peralta, Chicas del Can, Eddy Herrera pa menciona algun y a cosecha hopi admiracion internacional pa su talento di compone y produci musica cu toke inovativo. Asina mes Hilward a resalta pa su manera humilde y como musico multifacetico cu a laga su stempel atras den varios genero di musica. Na Aruba hunto cu su Dushi Band sigur a sa di laga su marca atras den musica di nos Carnaval y hunto cu Grupo di Betico a trece un ambiente unico y special pa temporada di fin di aña. Hildward a hiba Aruba semper den su mente y curason y haci nos tur orguyoso ora ela gana e Latin Grammy Awards pa e album Animacion di Wilfrido Vargas na aña 1990.

Minister Xiomara Maduro den su discurso tabata tin palabra di gratitud tambe pa e famia di Hildward, specialmente su mayornan Aida y Maiky cu a stimul'e y apoy'e pa sigui avansa den musica. Minister Maduro a dirigi su mes tambe na e yuinan di Hildward, Angelo, Natusha y Hillyann, expresando e alegria di por mira cu cada un a hereda e talento y creatividad di nan querido Tata Hildward pa cual nan por ta hopi orguyoso.

E mandatario a gradici tambe e directiva anterior di Stichting Maneho di Aruba su Carnaval (SMAC) cu a tuma e iniciativa pa haci e peticion na StraatnamenCommissie di Aruba pa nombra un caya na nomber di e gran musico Arubiano aki. Cu e nombramento di ‘Caya Hildward Croes’ Pueblo di Aruba ta gradici y recorda Hildward su legado pa musica en general y specialmente na cultura di nos Pais. Cu Dios por sigui duna Hildward paz eterno.

9 views0 comments

©Bo Informado