Proteccion y desaroyo di mucha mester wordo salvaguardia


Dia 20 di november ta Dia Internacional di Mucha y lider di Fraccion di POR, Dellanire Maduro, kier probecha e dia aki pa reflexiona riba derechonan di mucha.


Den convencion riba derechonan di mucha a presenta un mensahe hopi importante cual ta e echo cu no tin causa cu merece mas prioridad cu e proteccion y desaroyo di mucha unda supervivencia, stabilidad y progreso di tur nacion y civilisacion humano ta depende di nan.

Dellanire ta indica cu na e momentonan aki, unda henter mundo ta sufriendo e efectonan devastador di un pandemia, e derechonan di mucha, den e caso di proteccion y desaroyo ta wordo afecta tambe.


E situacion aki ta wordo mira na Aruba tambe, unda debi na diferente factornan, manera entre otro lesnan no por a continua na un manera fisico, muchanan mester a keda cas, falta di internet, falta di supervision y posibel aumento di probabilidadnan di abuso, hopi di nos muchanan no por a logra haya e desaroyo escolar y a keda exponi na situacionnan no desea.


Instancianan social, hudicial y educativo a bin ta traha incansablemente pa por logra atende e casonan aki y provee e desaroyo y proteccion necesario na nos muchanan, pasobra cada un di nan mester por sigui nan desaroyo den nan bida cu un sonrisa, alegria y posibilidadnan igual pa den futuro por ta ciudadanonan ehemplar contribuyendo na desaroyo di nan pais, Dellanire Maduro ta expresa.


Desde cu el a drenta Parlamento, Maduro a bin ta enfocando hopi riba e parti di desaroyo y cuido di mucha, riba nan derechonan y con por sigui traha pa fortalece e sistema pa por brindanan e siguridad y desaroyo cu nan merece.


Riba Dia Internacional di Mucha, Dellanire Maduro kier compromete su mes pa sigui traha pa logra fortalece cada un derecho di mucha na nos isla, y en especial, nan derecho pa por desaroya y conta cu e proteccion debido, logrando di e manera aki conta cu sernan humano alegre y cu e animo y perseverancia pa bay dilanti y yuda nan pais sigui bay dilanti.


E ta bisa na final cu riba e dia aki ta celebra e avancenan adkeri, na mesun momento ta pone nos reflexiona riba e derecho di nos muchanan y conscientisa nos comunidad di e importancia di esnan cu ta traha dia aden dia afo pa asina nos muchanan tin un miho futuro.


4 views0 comments

©Bo Informado