Prome Minister ta pretende un tipo di curashi cu ta mas un acto di coberdia


Siman pasa gobierno a manda yama miembronan di e tres fraccionnan cu ta sostene gobierno, pa mira con ta bay atende cu e cantidad di critica cu tin na e momentonan aki riba practicamente tur ministerio cu tin.

Melvin Tromp di partido AVP ta mustra cu for di oranan tempran di mainta, miembronan di Parlamento a tuma rumbo pa edificio di Cocolishi caminda gobierno un biaha mas lo a dicidi di usa e parlamentarionan aki, como simpel marionetanan cu ta wordo usa ora cu gobierno tin mester di nan servicio.

“E strategia tabata bisto dentro di algun ora, caminda a habri afo contra lider di partido AVP, sr Mike Eman caminda Prome Minister Evelyn Wever Croes tabatin e curashi di bin c’un reaccion di cobarde, cuestionando e maneho financiero di gobiernonan di Mike Eman.

Ta cos di hari, sigur di un Prome Minister cu primeramente nunca a cumpli cu pueblo, kende ta bay den historia politico di e pais aki, como e Prome Minister cu mas placa a ranca for di pueblo y for di comerciantenan y tur esaki sin duna algo a cambio.

Practicamente gabinete Wever Croes a supera gabinete Nelson Oduber IV como e gobierno cu mes placa a haya for di medidanan impopular tuma contra di pueblo, tur esaki despues di a sigura pueblo durante di campaña electoral, cu nan lo drecha e situacion financiero di e pais, SIN cu mester tuma medida.

E 11 marionetanan cu ainda ta sostene gabinete Wever Croes a sigui gobierno mal usa nan manera gobierno kier, caminda a manda yama un reunion publico pa atende un rapport di Algemene Rekenkamer riba e proyecto Bo Bario, buscando algo cu a bay robes pa hunga politica barata cu esaki pero hecho ta keda cu pueblo den tur bario cu e drenta, por mira realisacion di e e proyecto di Bo Bario.

Un proyecto pa desaroyo di barionan, caminda a inverti pa eleva e nivel di bida di ciudadanonan di tur bario, caminda e proyecto aki a yega te dilanti stupi di e centro di MEP na Santa Crus, sin cu e partido aki mes a yega di haci algo pa e bario aki.

Durante di e reunion a trata di haya algo robes pero con por haya algo robes si ta un proyecto cu a wordo controla pa Parlamento, a pasa aprobacion den varios presupuesto, hasta presupuestonan cu CFT a controla y aproba.

Despues esakinan por a bolbe wordo mira den e cuentanan anual cu a wordo presenta pero cu durante di gabinete Wever Croes, ya no ta wordo entrega mas, ya cu realmente e gobierno di MEP aki no ta haci net nada pa drecha e pais aki manera cu a wordo priminti.


Al contrario por bisa cu tur e desordo cu e marionetanan den parlamento tin cu sigui haci den proximo siman- y lunanan, ta pa distrae pueblo pa e posibel entrega di autonomia financiero di pais Aruba na gobierno Hulandes.

Mester distrae pueblo su atencion cu no tin placa pa pueblo pero sin tin miles y miles di florin pa paga tres Alto Comisario den e maneho desastroso cu Minister di Husticia a bin ta hibando.

Criminalidad ta sigui aumenta, tur esaki despues cu a priminti pueblo cu tur cas, cu tur caya rond di Aruba lo haya camara di seguridad pero net nada a wordo haci pero si a ranca cerca di 300 miyon flro di cartera di pueblo.

Plan Social mester a trece alivio den e presion social cu tin den pueblo, mester a trece alivio pa victimanan di abuso sexual y fisico pero te cu dia di awe e unico grupo cu a gosa di e plan social di Minister Glenbert Croes y su gobierno, ta famia- y amigonan di e minister y di e gobierno.

Na Hulanda a Sali publicacion e siman aki cu pa 2022 pensioen lo wordo reduci y tur cos ta indica cu esaki lo bira e caso tambe aki na Aruba, sigur den man di un gobierno cu nunca tabatin solucion, cu nunca a cumpli cu promesanan haci na pueblo.

Na luga di e pidi un reunion di Parlamento pa atende e rapport di Algemene Rekenkamer riba e proyecto Bo Bario, parlamentarionan cu ta sostene gobierno por a pidi Prome Minister bin mustra Parlamento tur e proyectonan cu nan a logra na cumpli cune den ultimo tres añanan.

Net NADA! Nada a wordo haci pa pueblo pero so pueblo a wordo confronta c’un aumento di costo di bida increiblemente halto, pueblo a conoce aumento di prijs di gasolin, pueblo a conoce problemanan serio den enseñansa, problemanan serio den turismo, problemanan serio den comercio pero di otro banda gobierno no tin nada mas di duna pueblo, cu no a cifranan riba casonan di covid-19, caminda maneho di esaki tambe ta wordo hopi cuestiona.



91 views

©Bo Informado