Prome Minister ta cumpliendo tres aña di manipula pueblo cu promesanan falso


Tres aña despues cu Prome Minister Evelyn Wever Croes ta encarga cu e cartera di energia, ainda tanto pueblo di San Nicolas y pueblo di Aruba den su totalidad, ta sperando ta kico gabinete Wever Croes su intencion ta cu e refineria na San Nicolas.

Parlamentario Mike de Meza di AVP a mustra cu tabata Evelyn Wever Croes den pasado como parlamentaria cu tabata grita cu bos halto cu e tin un cantidad di companianan interesa pa inverti hopi placa y maneha e refineria. Evelyn Wever Croes a bai “ora cero” y priminti henter pueblo cu e si ta kla pa di inmediatamente cu e drenta gobernacion percura pa pone e refineria aki cuminsa funciona.

Sinembargo awe ainda despues di mas cu 3 aña nada di Evelyn su lista largo di inversionistanan pa e refineria! Tanto pueblo di San Nicolas como di Aruba ta mirando cu henter e proyecto di refineria ta para solito y keto bai Evelyn Wever Croes ta para cu e e famoso yabi den su man! Actualmente ta solamente algun personal minimo di seguridad ta trahando den e luga aki.

“Tur hende por corda cu tempo cu Evelyn tabata den campaña a pasa bisa tur hende cu su persona tin un cantidad di companianan interesa pa habri e refineria, companianan cu ta habri porta pa su persona y no pa Mike Eman.

Awe den luna di oktober y tres aña den gobierno, e unico cu a saca bentaha te cu awor di e refineria den vision y pensamento di Prome Minister Evelyn Wever Croes, ta e bufete di abogado di su tata cu en realidad ta su bufete tambe como partner y heredero caminda cu e tabata traha tambe.

Como Prome Minister Evelyn a emiti un carta caminda e ta informa tur instancia cu e bufete di abogado di su tata no solamente lo representa su persona como Prome Minister den diferente reunionnan cu tin, tambe apenas dentro di 4 luna cu ela dentra gobernacion a pidi e bufete aki pa hinca den otro e posibilidad pa kibra contract cu Citgo, loke nan a cumpli tambe.

Mientras cu prosupuesto di gobierno di Aruba tin un deficit di 1.3 BIYON florin pa aña 2020, por a constata cu Prome Minister y e bufete di su tata, a permiti Citgo bandona Aruba sin cu nan a paga ni un cen preto di 320 miyon florin cu Citgo lo mester a paga na momento cu nan no cumpli cu e contract cu tabatin.

Pues aki un biaha mas pueblo por a mira cu Prome Minister no tin nada pa duna pueblo, no tin ningun proyecto pa presenta na pueblo pero ta bira cera e proyecto di refineria lagando e compania biyonario aki bay sin paga su deber di 320 miyon florin na pueblo di Aruba.

Ta mesun Prome Minister aki cu tabatin cantidad di compania den rij ta sperando riba su persona pa bin Aruba y habri e refineria pero awe ni nomber e no tin corda compania y riba dje a bay hunga otro wega cu leasemento di tankinan pa almacena crudo, papiando di cosnan grandi, gañando pueblo un biaha mas.

C’un cara serio el a declara na medionan di comunicacion cu varios grupo a participa den un destaho pa lease e tankinan caminda un compania a brinda e miho oferta cual Evelyn su gobierno a acepta.

Awor ta bin resulta cu e compania aki, cu a duna e miho oferta den e tantisimonan cu lo a inscribi pa e destaho aki, NO tin placa pa paga lease! Pues prome cu e proceso a cuminsa funciona, ya un biaha mas tur cos ta na cero ya cu e compania cu tanto Evelyn a confia cu nan lo haci algo pa asina e por mustra kico el a haci, simplemente no tin placa. Otro “spirito” mas cu e gobierno actual a deal cu ne. Esaki ta otro engaño mas di un Prome Minister cu lo bay den historia como esun di mas gañado cu pueblo a yega di conoce, uno cu hasta a gaña gobierno di Reino, bisando un cos pa despues haci otro cos. Asina pueblo por corda entre otro ora ela firma un protocol na luna di oktober di 2018 cu te dia di awe e no por cumpli cune. Ahinda tin discusion pa cu esaki. Mientras tanto tambe tin e famoso ley di Caft cu fraccion di MEP kier a cambia contra tur palabracion haci cu Evelyn mes, caminda Evelyn mes a sostene e cambionan aki, pa despues wordo confronta c’un KB y medidanan for di Den Haag. Awor practicamente Evelyn mester entrega autonomia di nos pais.

Tambe pueblo a ripara awor sigur cu Prome Minister Evelyn simplemente no por biba sin gaña. Awor cu supuestamente promer minister ta informa di un situacion cu a presenta, caminda un minister a mustra promer minister cu tin varios Minister di su gabinete cu ta meti den decisionnan ilegal y incorecto, promer minister a duna instrucion na su marionetanan den Parlamento pa bula cabes di e Minister cu a trece informacion dilanti di e actonan corupto na luz di dia.

Un votacion caminda tur cos ta mustra cu otro marioneta mas, kisas esun di mas grandi den Parlamento na e momentonan aki, esta Ady Thijssen, a trata di pobrecha di cierto palabracionnan pa mal usa esaki. Un Prome Minister cu ta pidi tur hende por fabor keda cas, no sali riba caya, no biaha si no ta di urgencia di bida, no bay beach, keda paden pa lucha contra corona virus pero ta bira gaña pueblo atrobe, ora cu pa su persona y famia si ta bon pa bula bay Miami, Florida pa pasa su vacacion anto bin bek. Un gobierno den un chaos total y un gabinete sin liderasco cu ta hinka Aruba den un abismo, Parlamentario Mike de Meza a declara.


24 views0 comments

©Bo Informado