Proceso di recicla y procesa desperdicio na Aruba ta corecto



ORANJESTAD, Aruba – 7 di maart 2021: Den un rapport emiti dia 7 di januari 2021, e compania Arcadis di Hulanda, un compania "consultancy" profesional di Hulanda, ta garantisa cu e procedura cu Ecotech Freezone ta aplica den su planta y na Ser'i Tijshi ta esun corecto y cu nan ta cumpli cu normanan internacional di medio ambiente. E rapport aki no ta unico, sino ta un di varios cu ta laga haci periodicamente pa controla e proceso y contenido di e "envirobales" nan cu ta dera diariamente den tera.

Manera ta conoci, ora cu Serlimar a cuminsa cu e proceso aki, cu tabata un iniciativa di Ecotech mes, a opta pa uza un otro compania cu ta dera e envirobales den tera. No ta sigur con e proceso ey a cana pero e tabata duna e vecindario bastante dolor di cabes, cu holor stinki y huma di gas cu a keda sali for di suela. Ora gobierno a opta pa cambia e compania y uza Ecotech mes pa dera e envoribalesnan, mesora a nota un cambio drastico.

Den e acuerdo cu Ecotech, a inclui cu periodicamente mester evalua e proceso y e calidad di e balesnan, via un compania acredita internacional. Den e caso aki, Ecotech ta cubri e gastonan pa trece Arcadis pa Aruba, den cuadro di nan trabou di control y evaluacion. E rekisito aki no tabata conoci antes ora Serlimar tabata uza e otro compania.

Den e rapport firma pa dr. ir. J. Verhagen y ir. P. Couwenberg, nan a constata cu e forma di traha actual, cu ta consisti di coleccion di desperdicio, reciclahe y procesamento den envoribales, ta esun di mas adecua pa maneha desperdicio residencial y comercial na Aruba. Tambe nan a constata cu e deramento di envirobales den tera tambe ta canando di acuerdo cu normanan internacional di medio ambiente.

Tocante Arcadis

Arcadis NV ta un compania mundial di diseño, ingeneria y “management consulting”, funda na aña 1888 y tin su oficina principal na Zuidas, na Amsterdam, Hulanda. E ta miembro di e Next 150 index. E compania a cuminsa como Nederlandsche Heidemaatschappij y na aña 1997 a cambia pa Arcadis. Awendia nan tin riba 350 oficina den 40 pais rond mundo.

9 views0 comments

©Bo Informado