Presentacion candidadato nobo di AVP, dr.mr Rycond Santos do Nascimento


“Aruba mester di liderasgo participativo pa atende cu necesidadnan di pueblo”



Diadomingo atardi a tuma luga na Cas di Partido AVP, den un esfera modera, presentacion di mr. dr. Rycond Santos do Nascimento, kende despues dia explora politica den tur su facetanan pa algun tempo caba y despues di consulta estrecho cu su famia, a dicidi di drenta arena politico y a uni su mes na e partido berde, e partido di speransa, esta AVP.

E presentacion a tuma luga c’un grupo chikito di invitado via di zoom y diferente pagina di facebook, demas personanan a participa na e acto special y unico aki, cu sin duda a laga un tremendo impression atras.

Hopi hende conoce mr. dr. Ryçond Santos do Nascimiento dor di Universidad di Aruba unda su persona tabata lector pa algun aña caba y e tabata wordo carga riba teblachi di oro pa su studiante y coleganan cu tabatin aprecio masha grandi, pa e persona cu e ta, e docente y educador sublime cu semper ta raya un esfera di positivism rond di dje.

Apesar di a enfrenta hopi contratiempo den sufuncionamento na UA, Ryçond no a entrega y a busca altertnativanan caminda ela wordo aserca pa Universidad di nos ruman isla Corsou. Aki el a haya un bunita oportunidad pa desplega su inteligencia, talento y perseverancia.

Sinembargo Rycond Santos do Nascimento ta haya cu e tempo a yega pa e duna bek na su pais y aki por mustra cu el a studia ley y a doctora cu e tesis ' Het Koninkrijkontsluierd' cu ta regarda temanan importante den Reino.

Analisando e situacion cu tin actualmente unda tin hopi discusion y un bay'bin di palabra entre Hulanda y Aruba, entre politiconan di Aruba y Hulanda, su persona ta kere cu hunto cu partido AVP, por yuda trece solucion y establece trankilidad bek riba e isla aki.

Sin duda cu tin hopi problema cu mester di atencion y mr. dr. Ryçond Santos do Nascimento ta convenci den sinta na mesa y cu den dialogo constante por logra ataca e crisis aki di e miho forma y haya solucion pa esakinan, mustrando cu nos mester di otro den Reino, e miho cos ta pa nos traha hunto pa nos bay dilanti.

Durante di un presentacion impresionante, mama di Rycond, esta Rebecca Geerman a duna un introduccion cortico di su yiu, kende semper tabatin un comportacion masha ehemplar pa tur cu ta rond di dje, tanto di famia como otronan cu el a yuda prepara y guia den nan estudio, como tambe otro hendenan cu e ta topa y conoce den comunidad.

Señora Rebecca a enfatisa cu su yiu semper a busca y haci lo maximo pa tur rond di dje, semper dunando respaldo y motivacion pa tur hende sali dilanti y logra lo miho cu nan por den nan bida.

Dr. Luciando Milliard un rato a repasa su experiencia como docente di Rycond na Universidad, enfocando riba su determinacion y su empeño pa logra loke e tin cu logra pa asina no solamente yuda su mes pero tambe haci di otronan e miho cu nan por ta den nan bida.

Durante di su presentacion, Rycond a mustra cu no ta un opcion di para na banda mas, bisando cu acepta pa para na banda, ta inaceptabel ya cu tin hopi decisionnan cu a wordo tuma y tin cu busca e solucion awor pa sali for di esakinan.

Na mes momento e candidato di AVP a señala cu tin cu para e cultura di represaya, cu mester elimina e liderasgo anti democrativo y cambia esaki pa un liderasgo participativo, caminda tin envolvimento di tur hende y tur organisacion den comunidad,

“Awor no ta momento pa para na banda,” mustranado cu su decision pa drenta politica ta pa traha riba alternativa y solucionnan pa saca e pais aki dilanti.

Lider di AVP, Mike Eman, a mustra riba un momento grandi y historico, ya cu no solamente e partido ta sinti su mes bon di haya un candidato cu e determinacion cu Ryçond ta demostra pero ta henter comunidad lo sali beneficia di su conocemento y su determinacion pa traha hunto cu partido AVP pa sali na vanguardia di henter e pueblo pa alivia e presion grandi cu a ser poni riba nan durante di ultimo tres aña y mey.

22 views0 comments

Recent Posts

See All