Por cuminsa entrega e “Verzoek vermindering loon” di aña 2021

Entrega e peticion den forma digital via www.impuesto.aw



ORANJESTAD Departamento di Impuesto (DIMP) ta participa cu e contribuyentenan por cuminsa entrega e “Verzoek vermindering loon” di aña 2021. Esaki ta un peticion cu tur empleado – pues un persona cu tin un doño di trabou - y cu ta pagando interes riba fiansa personal y/of hipoteca, por haci.


Salario anual di e empleado

Un doño di trabou tin cu calcula e salario anual (zuiver voljaarsloon) di su empleado y a base di esey e ta calcula cuanto loonbelasting e empleado mester paga den un aña. Den e calculacion, e doño di trabou no ta obliga pa tene cuenta cu e gastonan personal di e empleado.


Reduccion di e salario anual calcula

E empleado por pidi pa reduci e salario anual y consecuentemente e impuesto riba su salario cu su doño di trabou a calcula p’e. E ta haci esaki ora e y/of su casa tin gasto di interes di por ehempel un fianza personal y/of hipoteca. E empleado no por djis pidi su doño di trabou pa baha su loonbelasting. E mester entrega e peticion “Verzoek vermindering loon” na Departamento di Impuesto hunto cu e comprobantenan manera carta di interes di banco.

Inspector di impuesto lo controla e documentonan y tuma un decision pa medio di un “beschikking”. E empleado na su turno lo duna su doño di trabou e decision aki pa por ehecuta esaki. Reduccion di e salario anual calcula ta nifica cu e empleado lo bay paga menos loonbelasting durante e aña concerni y asina ricibi un suma poco mas halto den su man cada bes cu e cobra.


Con por entrega e peticion?

Pa hacie mas facil pa e empleado, awor Departamento di Impuesto ta brinda e posibilidad na e contribuyente pa por upload su peticion hunto cu tur e comprobantenan necesario den un forma digital. Riba e pagina principal di www.impuesto.aw ta click riba “Digitale formulieren” y despues scoge “Verzoek vermindering loon”. E ta un formulario digital cu ta simpel pa yena y upload e documentonan. Di e forma aki Departamento di Impuesto ta facilita su contribuyentenan pa entrega e documentonan sin tin mester di yega na su oficina personalmente.


Pa informacion mas detaya, por consulta e website di Departamento di Impuesto www.impuesto.aw.


Gerencia di Departamento di Impuesto

27 di november 2020


9 views0 comments

©Bo Informado