Periodo di alivio prolonga den bijstand


ORANJESTAD – Despues cu na maart Aruba a conoce su prome caso di COVID-19, Gobierno di Aruba a introduci un periodo di alivio den e proceso di bijstand y den luna di juli 2020 e periodo di alivio a keda prolonga cu tres luna mas y pues ta valido te cu november 2020.


Proceso di bijstand normal

E proceso di bijstand ta traha a base di ley y tur calculacion ta regla den ley. Tur persona cu haci un peticion pa un ayudo financiero temporal esta bijstand y cu por en berdad haya e ayudo temporal, ta hay’e a base di su situacion y con su situacion ta pas den e cuadro di ley di bijstand.

Cada decision sea pa duna, kita, subi of baha bijstand, ta stipula den un maneho cu e trahado publico mester mantene su mes na dje.


Periodo di alivio temporal

Na maart 2020 en conexion cu COVID-19, a keda introduci un periodo di alivio como meta pa acelera full e proceso di aplicacion pa bijstand. Pa por logra acelera e proceso di aplicacion pa bijstand, a duna algun excepcion temporal pa loke ta trata e parti di cumplimento cu Departamento di Progreso Laboral (DPL) y Medwork.


Cantidad di peticion nobo

Departamento di Asunto Social (DAS) su seccion di bijstand a otorga te cu comienso di juni 2020 un total di 1075 formulario di peticion di bijstand. Di e 1075 formularionan otorga, 742 formulario a wordo entrega bek pa asina cuminsa cu e peticion di bijstand. Te cu luna di juni 2020 un total di 186 peticion nobo a keda aproba.


Final

Por ultimo, DAS kier informa cu si un cliente no ta di acuerdo cu cualkier decision, e por entrega un keho na Departamento di Asunto Social cu un copia pa e Secretariado di e 'Bezwaaradviescommissie' LAR. E keho mester ta entrega dentro di seis (6) siman for di e fecha cu tin riba e carta di notificacion.


Pa mas informacion of cualkier pregunta tocante bijstand por tuma contacto cu DAS na telefon 528-1100 of 528-1110 of ‘like’ nos pagina di facebook “Departamento di Asunto Social” y keda bon informa.



.


63 views

©2020 by Bo Informado