Partido MAVIS

Partido Maneho Asertá, Visibel I Sigur ta introdusi su promé 4 Kandidatonan pa Elekshon di Parlamento na mart 2021.



Willemstad – Partido Maneho Asertá, Visibel I Sigur ta trahando riba un ekipo “TO GET THINGS FINALLY DONE”. Esei sigur ta un reto grandi den un Pais dominá pa “Old School Politics”, promesanan ku no ta wòrdu kumplí i korupshon. Un tim ku por saka nos Pais for di e abismo ku e ta aden i ku no tei pa privilegionan polítiko òf poder. E no ta fásil.

Pero tòg ku hopi satisfakshon i orguyo nos ta presentá e promé kandidatonan riba lista di Partido MAVIS. Ta trata aki di personanan ku no kièr sigui para na banda, ku ta komprometé ku nan komunidat i ku tin ekspertisio riba tereno di salubridat, turismo, digitalisashon i e aparato gubernamental entre otro. Polítikonan nobo ku kièr sirbi nos Pais i ku ta komprometé di traha huntu riba desaroyo di nos komunidat, kaminda progreso ekonómiko, konbibensha i inovashon ta para sentral. Personanan ku konosé e nesesidatnan di nos komunidat dor di eksperensia propio i kièr hasi algu, sin pèrdè for di bista tur loke ta kanando bon.


Kòrsou ta para dilanti un reto inmenso

Presupuesto di Pais mesté ta na òrdu. Ekonomia mesté krese pero den konkordansia ku medio ambiente. Gastunan pa ku e aparato gubernamental mesté baha i efektividat mesté subi. Nos demokrasia mesté madurá. Gobièrnu i Parlamento mesté aseptá nan responsabilidat i traha ku desishon firme pa loke nan a ser eskohí; esta pa goberná, mantené i kontrolá. Nos enseñansa mesté wòrdu modernisá i ta konektá mihó ku e merkado laboral. Nos sistema di salú mesté wòrdu reforma i ta semper aksesibel i pagabel. Ta nesesario pa fortalesé nos estado di derecho i kombatí kualke debilidat. E relashon den Reino mesté ta basa riba konfiansa i rèspèt mutuo i no riba fabor.


Haitham Metry (51) Empresario

Metry a skohe pa Partido MAVIS, pasobra den tempu difísil ku nos ta pasando aden, Kòrsou mesté di un lider ku sufisiente kurashi i determinashon, ku te asta ta duna e partido su nòmber komo garantia. Un lider ku konosé Kòrsou mihó ku kualke otro i ku un kurason na lugá pa Pais i komunidat. “Mi a mira hopi polítiko bin i bai, ku a hasi hopi promesa sin nunka kumpli. Asina tantu ku e pueblo no sa mas kiko pa kere òf no. P’esei mi a pone mi mes disponibel pa drenta polítika i bai traha pa mi Pais ku ta meresé mihó”, segun Haitham Metry.


Nos Pais a ser afektá fuerte dor di Covid-19, espesialmente e sektor turístiko. Covid a demostrá nos kon frágil nos Pais ta ora e pandemia a benta un di nos pilanan ekonómiko mas importante abou. Ta p'esei Partido MAVIS ta kere ku nos mesté traha rápido riba mas fuente di entrada duradero i di trabou i hasi ehersisionan nesesario pa logra esaki. Turismo semper lo keda un fuente di entrada importante. Tin hopi potensial. Ta p’esei nos mesté sigui sostené e sektor mas tantu ku ta posibel pa e sobrebibí i sigui invertí kaminda mesté pa garantisá su futuro. E úniko forma ku nos por garantisá esei ta di kuida tur loke ta atraktivo pa atraé e turista riba nos isla. Invertí den nos playanan i mantené nan limpi, stòp di dùmp sushi tur kaminda, traha riba infrastruktura, stimulá arte lokal i krea insentivo pa nos hendenan invertí mas den e sektor turístiko.


Dennis Anthony (48), Konsultor den teknologia di informashon

Aña 2020 tabata un aña difísil pa Kòrsou. Nos komunidat no únikamente a pèrdè konfiansa den nos mandatario i polítikonan, pero tambe den nos outonomia. Nos a bira un Pais kaminda hopi famia ta dependé di un saku di kuminda pa por sobrebibí. Nos a para bira un Pais ku no ta kuida esnan ku mas tin mesté di nos; e muchanan, nos hende grandi i refugiadonan. Esaki no ta e futuro ku Dennis Anthony kièr pa nos komunidat. Kòrsou por mihó i ta meresé mihó. Kòrsou mesté di un Parlamento fuerte ku ta kontrolá gobièrnu. Un Parlamento ku ta trese konfiansa bek den polítika i den nos demokrasia. Kòrsou ta meresé un gobièrnu ku ta traha pe. Un gobièrnu ku ta antisipá i ku ta traha a base di un plan real. Ku Partido MAVIS, Anthony tin e oportunidat di traha pa su Pais, huntu ku un tim ku ta dispuesto di hasi e trabou. Un partido polítiko nobo ku no ta mará na pasado i ta bai traha pa un mihó futuro.


Riba diferente área, manera entre otro di salubridat, enseñansa i desaroyo sosial tin hopi trabou pa hasi. Tambe riba e tereno di outomatisashon i digitalisashon. Hasiendo e ehersisionan nesesario lo garantisá un servisio efikas, ku lo baha gastu i lo mehorá e klima di invershon i e posishon kompetitivo entre empresarionan.


Kenneth Dambruck (65), èks direktor di MOT, kombati labamentu di plaka

Dambruck a regresá Kòrsou bek den añanan 80 i for di e tempu ei e no a konosé polítikonan ku a hinka sufisiente energia den progreso di nos komunidat, ku no ta den temporada di elekshon. El a tuma nota di hopi plan pa atraé invershonista, miéntras den Pais mes tin pobresa, infrastruktura deplorabel, enseñansa ku ta empeora kada dia, inseguridat den bario, impuestonan altu pa penshonadonan ora nan kièr buska un trabou èkstra pa por kubri nan gastunan, transporte públiko ku ta laga di deseá, djis pa menshoná algun. Hopi di e ehersisionan menshoná ta kosnan ku por a wòrdu solushoná den apénas un aña.

Ora Kenneth Dambruck a sera konosí ku e plannan di Partido MAVIS, mes ora el a join. Un partido liderá pa un persona ku ta skucha i ku ta konsistí ademas di kandidatonan ku kurason pa e pueblo i nos komunidat. Personanan ku no ta interesá ni den státus òf den prestigio, pero ku kièr traha pa nos Pais.


Último añanan a traha hopi proposishon di lei, plan i rapòrtnan di investigashon. Varios di nan ku a kosta komunidat hopi plaka. I mayoria nunka a ser ehekutá i ta wardá den un lachi. Tin sufisiente plan i investigashon, proposishon di lei ku por ser aktualisá i usa mesora. Aparte di a gasta hopi sèn, tambe hopi energia i tempu a ser hinka dor di ámtenar i gruponan den nos komunidat den esaki. Partido MAVIS lo kièr hasi uso di tur e esfuersonan aki.


Herbert Plantijn (39), Enkargá ku e departamento di kliente na hospital

For di su 15 aña Plantijn a sinti su mes yama pa yuda hende i sirbi nos komunidat. E ta traha 20 aña kaba den e sektor di salubridat i ta konsiente ku por mihó. Su eksperensia i kurason pa sirbi hende i su kapasidat pa guia, tabata e motibunan prinsipal pa drenta polítika aktivo. Partido MAVIS ta brinda Herbert Plantijn e oportunidat, espasio i e toolsnan nesesario pa hasi e trabou ku konvikshon i konfiansa.


Kòrsou ta un Pais chikí kaminda tin dos hospital i bários klínika. Partido MAVIS kièr logra un forma di koperashon entre tur e identidatnan den salubridat. Pa por garantisá un mihó servisio den e sektor, ta importante pa agrupá algun kuido spesífiko ku ta ser brinda dor di sierto entidat. Por ehèmpel pashèntnan di kuido intensivo mesté ser risibí mes ora den e unidat di kuidonan intensivo. Ei nos tin profeshonalnan prepará i sertifiká pa duna kuido nesesario. Asina tin tambe dos hospital ku ta hasi operashon di katarata. Dos hospital ku ta spesialisá den malesanan di garganta, nanishi i orea. Nos por klasifiká kada malesa, investigashon i tratamentu segun nan komplehidat. E bentahanan ta grandi pasobra por risibí mas kuido spesialisá i nos por haña mas eksperensia kon pa trata sierto malesa den un lokalidat. Na término largu nos komunidat por risibí un mihó kalidat di kuido i bo ta evitá “medical window shopping”.


Partido MAVIS ta bai e reto aki ku un tim, ku pronto lo wòrdu oumentá ku mas kandidato profeshonal, ku hopi konfiansa riba tres área: 1) Deskubrí solushonnan ku urgensia; 2) Konstruí un base sólido pa reformanan struktural (análisis i planifikashon); i 3) Implementashon ku determinashon i kontrol di tur plan. Nos ambishon ta pa Kòrsou bira e sentro di mas importante den Latino Amérika i un isla komo modelo den region. LET’S GET IT FINALLY DONE


25 views0 comments