Parlamento lo trata e ley cu ta reglamenta funcionamento di “Veiligheidsdienst Aruba”.


Dentro di poco Parlamento lo trata cambionan den e ley existente cu ta reglamente e funcionamento di nos departamento encarga pa garantisa Seguridad Nacional na Aruba, cual ta “Veiligheidsdienst Aruba” (VDA). Pa e motibo ey ayera, e comision fiho pa asuntonan Hudicial den Parlamento, a ricibi un presentacion extenso di VDA y departamento legislativo (DWJZ).

CAMBIONAN DEN LEY

E meta di e cambionan proponi ta pa brinda mas transparencia pa loke ta e autoridad di e departamento pero na mes momento tambe pa brinda e departamento e instrumentonan necesario pa por eherce nan tarea optimalmente. Pero tambe e meta ta pa e comision cu ta encarga cu control riba e departamento haya mas autoridad pa controla.

VEILIGHEIDSDIENST ARUBA

E ley existente ta data di 2002. E mundo di seguridad nacional a desaroya hopi durante e ultimo 18 añanan pues e necesidad pa adapta e ley existente ta grandi. E departamento aki ta encarga pa conseha organisacionnan vital pa loke ta nan seguridad, compila informacion cu lo por forma un menasa pa seguridad nacional y comparti esaki cu e instancianan concerni, traha analisisnan pa loke ta riesgo y peliger, y tambe nan ta encarga pa emiti e “verklaring van geen bezwaar” pa loke ta funcionnan “vertrouwelijk”.

COMISION ENCARGA PA CONTROLA VDA

Manera a wordo indica un di e metanan di e cambionan den e ley tambe ta pa e comision cu ta encarga pa controla VDA haya mas autoridad. E “commissie van toezicht” ta controla e manera con e departamento ta eherce su tareanan y tambe si e instrumentonan cu ta wordo usa ta wordo usa na un manera legitimo. Pa loke ta e parti di “veiligheidsonderzoeken” tambe e comision tin un tarea crucial y anualmente tin un rapport publico cu ta wordo publica riba e funcionamento di e departamento. Cualkier ciudadano cu por tin un keho riba funcionamento di e departamento por acudi na e comision aki, cual comision lo investiga si e keho riba e departamento ta legitimo.

PA CONCLUI

Durante e reunion di comision nos tambe a toca e hecho cu na Hulanda ta existi un comision Parlamentario cu ta wordo informa structuralmente di tareanan y informacion cu ta wordo compila door di e departamento di seguridad. Obviamente e comision aki mester tene nan mes na secrecia y nada no mag wordo comparti. E pregunta ta keda cu si politiconan na Aruba ta suficiente responsabel pa adkeri un responsabilidad asina grandi, y cu si oposicion no lo haci maluso di esaki.

1 view0 comments

©Bo Informado