PARLAMENTO DI ARUBA TA CONTRA CONDICIONNAN DI HULANDA

Parlamento di Aruba ta den debate riba e condicionnan cu Hulanda a pone pa e di tres fiansa. E fiansa aki ta necesario pa cubri e lunanan di juuli, augustus y september. Na forma sorpresivo, casi bo por bisa, di tricion, Hulanda a bin awor cu cantidad di condicion, entre nan dos cu ta hopi pisa pa Aruba. Tur miembro di Parlamento ta indigna pa e hecho cu Hulanda kier kita autonomia di nos pais, y hasi’e den secrecia tambe, pasobra no ta permiti Minister President pa comparti e documentonan cu Parlamento. Con Parlamento por forma un opinion, sin haya documento? Minister President a indica cu e tambe ta desapunta den e forma di proceder di Hulanda, caminda cu hustamente dos principio cu Hulanda semper ta yena su boca cune, transparencia y principionan democratico, Hulanda mes ta trapa esakinan. Hulanda no ta permiti Gobierno di Aruba pa ta transparente, y ta trapa principionan democratico. “Nos no ta contra e supervision ni e reforma, e tabata duro pero nos a cumpli cu e condicionnan cu a wordo poni den e prome dos fiansanan. Nos ta contra cu kier pa nos pais acepta un reforma di structura estatal sin por dialoga ni siquiera duna informacion, y cu no tin nada di haber cu e crisis di Covid. Ta duel mi cu mi no por duna Parlamento e documentonan. Mi a pidi Premier Rutte pa duna aprobacion pa por comparti e documentonan”, Minister President a bisa. Varios miembro di Parlamento a expresa di ta sorprendi cu e exigencianan aki, pasobra Aruba ta cumpliendo cu tur e exigencianan, cu riba nan mes tabata exigencianan hopi pisa. Pues no tabata tin motibo pa e exigencianan desproporcional. REACCION DI PARLAMENTARIONAN Parlamentarionan di tur fraccion a indica di no ta di acuerdo pa acepta e condicionnan, y principalmente a condena e falta di respet pa cu Parlamento, pasobra Hulanda kier pone Parlamento totalmente un banda. Lider di Fraccion di MEP a indica cu lo cuminsa cana camindanan internacional pa desenmascara e presion desproporcional cu Hulanda ta pone riba Aruba siendo cu Aruba a wordo hopi afecta door di Covid-19. Fraccion di AVP a bisa cu ni Minister President ni Gobierno por bai di acuerdo, pero mester consulta cu pueblo. Fraccion di POR ta di opinion cu algo asina no por djis tuma decision, y cu mester tin espacio pa negocia. Fraccion di RED ta di opinion cu mester tene cuenta cu pueblo no mag di sufri di hamber, pero tampoco por acepta esaki sin mas, y mester desenmascara e accionnan aki. Miembro independiente Lejuez a expresa cu sin documento Parlamento no por hasi su trabou y a pidi pa haya e documentonan prome, of si no por, pa e por haya lo menos un sinopsis. Mester remarca cu Parlamento a para riba un linea cu no por acepta cu Hulanda ta actua den secrecia. Sigientemente Parlamento lo manda un carta pa Hulanda pa exigi e documentonan.


53 views

©Bo Informado