Parlamentario Shailiny Tromp-Lee (MEP):

Fraccion di MEP ta cla pa continua cu segunda tanda cu Minister Lopez-Tromp


Den e reunion publico di dia 31 di augustus 2020 Parlamento a cuminsa trata desconfiansa contra Minister Lopez-Tromp (POR) presenta door di su Fraccion. Despues cu parlamentarionan a haci nan comentario y preguntanan durante e prome tanda, nos tur por a conclui cu e reunion a dal ful un buelta. Durante su contestacion di prome tanda Minister Lopez-Tromp a informa Parlamento di diferente irregularidad y casonan di corupcion. Informacion cu nunca antes e minister en cuestion a yega di menciona publicamente of a informa Parlamento di nan.

Riba peticion di Lider di Fraccion di POR, cu acuerdo di Minister Lopez-Tromp, Presidente di Parlamento a schors e reunion pa duna espacio pa un ultimo posibilidad di intermediacion di parti di Minister President. E ultimo aki a keda acerca pa POR pa haci esaki.

Door di e schorsing aki Fraccion di MEP no a logra haya e oportunidad (di dos tanda) pa pidi e documentacion y pruebanan necesario di tur e acusacion of informacion ricibi y tampoco por a puntra e minister pa mas splicacion y informacion encuanto e procesonan encamina pa atende cu e diferente situacion indica. E presentacion di Minister Lopez-Tromp durante prome tanda sigur a trece hopi pregunta cu ne. Pa es motibo aki mes, mediante Lider di Fraccion sr. Rocco Tjon, a dicidi di dirigi un lista cu 45 pregunta na Minister President. A dicidi di haci esaki pa por haya claridad y splicacion y tambe pasobra Minister Lopez-Tromp a informa Parlamento cu su colega Ministernan, incluso Minister President, ta debidamente informa. Adicionalmente dia 3 di augustus 2020 Fraccion di MEP a haci un peticion oficial na Presidente di Parlamento pa yama un reunion cu Minister President pa atende cu tur e irregularidadnan y casonan di corupcion presenta pa Minister Lopez-Tromp.

Mirando e gravedad di e situacion presenta door di Minister Lopez-Tromp y cu den prensa e la indica cu e tin mas informacion pa duna Parlamento, ta na su lugar pa asina cu e proceso di intermediacion finalisa, e di dos tanda keda yama pa Presidente di Parlamento. Alabes ta bon pa pueblo sa cu Fraccion di MEP lo percura, pa asina cu nos ricibi contestacion di e 45 preguntanan, pa e reunion cu Minister President keda yama. Integridad y bon gobernación ta di suma importancia pa Gabinete Wever-Croes y mi ta convenci cu lo aplica e regla “esun cu haci malo prepara pa sinta riba su blaarnan”.




10 views0 comments

©Bo Informado