Parlamentario Shailiny Tromp-Lee (MEP):

Ta importante pa gobierno di Aruba keda negosha na mesa di reunion, pasobra tanten tin dialogo tur cos ta posibel!



Durante e encuentro publico cu a tuma lugar dia 13 di augustus ultimo caminda Gabinete Wever-Croes a bin informa Parlamento encuanto e negosacionnan cu Hulanda, Parlamentario Tromp-Lee na prome lugar a gradici y elogia Minister President pa su transparencia y con, na un manera of otro, e ta envolucrando tur stakeholders den e proceso di negosacionnan cu Hulanda. Esaki no obstante e agenda sobrecarga cu e tin caba pa loke ta trata e dolor di cabes di mas grandi di nos pais cu ta COVID-19 banda di e maneho general di nos pais.

Durante e encuentro publico Tromp-Lee a indica cu e ta experiencia e situacion cu nos ta aden como un “catch 22”. Esey mes a pone cu e no solamente a repasa e documentonan ricibi for di gobierno pero tambe a bay bek na su responsabilidad como parlamentario. E la sinta kibra cabes kico ta lo mihor pa haci y su sentimento a hib’e na algun grabacion di nos libertador. Pesey mes prome cu e la expresa su opinion encuanto e negosacionnan cu Hulanda, el a ripiti e siguiente frasenan di nos libertador, sr. Betico Croes dfm.: ‘Si nos mester cay na caminda, hamas boso laga e causa un banda, pero gara e bandera Arubano y sigui lucha pa realisa y preserva e libertad di nos pueblo! Pasobra ki bal un homber sin derecho, ki bal un homber sin bandera, ki bal tin curason den pecho si bo no ta liber den bo tera’. Tromp-Lee ta enfatisa cu esakinan ta frasenan bon conoci y cu hopi hende sa uzanan y cu na su opinion awe mas cu nunca mester ponenan den pratica.


Tromp-Lee a subraya cu ta un reto inmenso pa Gobierno y Parlamento pa preserva nos libertad y garantisa cu nos ta keda baas den nos propio cas. Esaki pasobra despues di casi 1 luna di negosacion cu Hulanda, manera ta para den e carta cu Parlamento a ricibi di Minster President fecha 11 di augustus 2020, e negosacionnan no a conduci na e cambionan proponi, desea y cu ta sumamente necesario pa garantisa nos estado di derecho y nos democracia.

Tromp-Lee ta consciente con duro Minister President, Minister Maduro y nan teamnan ta trahando y ta spera di curason cu Hulanda no solamente ta keda indica cu tin espacio pa negosacion pero cu en realidad Hulanda lo demostra cu berdaderamente nan ta tene cuenta cu puntonan crucial y di importancia cu Aruba a bin ta presentando. Tromp-Lee ta spera cu na lugar di kier sigui impone, ta crea e espacio real pa traha hunto cu respet pa otro y pa nos constitucion y leynan existente.

Un les cu segun Tromp-Lee el a saca di e situacion di crisis aki ta, cu e corona virus aki sigur a bin mustra nos tur, con vulnerabel nos ta y mas ainda el a enfatisa cu si Gobierno di Mike Eman a hiba un maneho financiero responsabel y duradero awe nos situacion lo tabata otro.

Algo cu sigur Tromp-Lee nunca a spera ta cu mei mei di un situacion di crisis caminda cu e virus a bin paralisa practicamente nos economia completo, negoshinan mester a sera, tata y mamanan di famia a perde entrada of salario completo, scolnan a sera y nos muchanan a keda perhudica y e futuro di nos pais ta tambalia, cu Hulanda kier pone nos na rudia y a presenta un pakete di condicion inhusto pa nan por presta nos placa. Placa cu nos mester bay paga bek! Sigur e situacion aki ta incomprendibel mirando cu Gabinete Wever-Croers a bin ta cumpli cabalmente cu tur palabracionnan. E maneho financiero responsabel di Gabinete Wever-Croes a percura pa logra ya na 2019 caba pa sera cu un surplus y si no tabata pa COVID-19 e aña aki nos pais lo a conoce un surplus di 46 miyon florin.

Durante e ecuentro Tromp-Lee a bisa cu e ta para pa nos status aparte, nos autonomia y nos democracia. E ta para pa e capacidad y conocemento di nos mesun yiunan di tera, e ta para pa stop cu abuso di poder! E ta un Arubiano orguyoso, un Arubiano cu conoce y a siña di e lucha pa nos status aparte y cu e ta un Arubiano cu ta balora tur loke nos a logra desde 1986! Y pesey mes e ta haya e proceso cu Hulanda a encamina pa loke ta trata e di 3 tranche financiero ta uno inaceptabel y condenabel. Principalmente e echo cu ya desde 24 di juni 2020 e Colegio di Supervision Financiero (CAFT) a conseha Hulanda pa duna Aruba e fianza aki (lesa carta CFT202000079).


Tromp-Lee a finalisa bisando cu na e momentonan aki ta imposibel pa e bay di acuerdo pa Gobierno mara Aruba na e dos consensus rijkswetnan cu ta riba mesa, caminda kier crea un entidad caminda Aruba no tin representacion real, un entidad cu ta bay haya autoridad desproporcional y lo bin sinta riba stoel di Gobierno y Parlamento. E ta splica cu e no lo por yuda crea un situacion caminda Aruba no lo ni por apela un decision di e entidad aki ora nos no ta di acuerdo cu ne y por ultimo a bisa cu lo ta dificil pa e por bay di acuerdo cu un rijkswet cu ta carece di e criterianan obhetivo necesario cu mester indica na ki momento nos por sali di dje.

Banda di e puntonan aki, y e peticion pa entrega e peticion na Gobierno di Hulanda pa un ‘spoed voorlichting’ door di Raad van State na Hulanda tambe el a pidi Gobierno pa bay sigui negocia riba nan. Segun Tromp-Lee ta importante pa gobierno di Aruba keda negosha na mesa di reunion pasobra tanten tin dialogo tur cos ta posibel!


12 views0 comments

©Bo Informado