Parlamentario Shailiny Tromp-Lee (MEP):


Parlamento a aproba unanimamente e Mededingingsverordening cu ta trata reglanan encuanto competencia y alabes institucion di un ‘Autoriteit Markt en Consument’


Despues di hopi aña cu a traha riba e Mededingingsverordening (Ley pa trata competencia) porfin awe 1 di juli 2020 el a keda trata den sala di Parlamento caminda unanimamente e la keda aproba. Un palabra di gradicimento sigur ta na su lugar pa tur cu di un forma of otro durante añanan a aporta na creacion di e ley aki.


No obstante cu en principio nos ta sali for di e punto di salida cu den un mercado liber demanda y pregunta ta tene otro den ekilibrio toch, door di e realidad aki na Aruba, ta necesario y deseabel pa tin regulacion pa loke ta trata competencia. Meta final ta pa percura pa e consumidor keda protehi y sali beneficia door cu ta preveni cu companianan ta actua unfair cu nan concurencia y nan clientenenan.


E ley di competencia ta trata entre otro prohibicion di ‘Kartelvorming’ cu tin di haber ora cu companianan ta haci palabracionnan cu ta influencia e mecanismo di mercado liber, mayoria biaha ta referi na palabracionnan encuanto prijs. Alabes a ley ta trata prohibicion di abuso di ‘economische machtspositie’: esaki ta e caso ora un compania ta asina poderoso cu casi e no mester tene cuenta di otro companianan riba mercado y por manipula beneficiosamente (pa su mes) e resultado di mercado y esaki sigur semper lo ta den desventahe di e cliente. Otro aspecto cu e ley ta trata ta supervision pa preveni concentracion di companianan cu por conduci na un posicion dominante di poder te cu nan por elimina of influencia cualkier tipo di concurencia.

Deseo ta pa na tur momento por vigila y garantisa concurencia efectivo y mas cu claro promove esaki. Pa es motibo aki mes e ley ta trata tambe institucion di e ‘Autoriteit Markt en Consument’ cu lo ta un instancia independiente cu lo mester percura cu e ley aki ta keda aplica. Ta bay tuma gobierno 12 luna pa institui y implementa e autoridad aki riba menciona.


Tin diferente argumento pakico introduccion di un ‘mededingingsbeleid’ basa riba e ley aki ta importante pa nos pais:

  • E ta garantisa e interes di e consumido pasobra e ta conduci na prijsnan mas abou, mihor calidad y variedad den producto y servicio;

  • E ta percura pa un level playing field pa companianan;

  • E ta percura pa confiansa cerca inversionistanan di afor;

  • E ta stimula innovacion di producto y proceso;

  • Trahando hunto cu otro autoridadnan di otro pais por combati operacion di cartel internacional;

  • E ‘autoriteit’ lo hunga un rol informativo y di educacion pa loke ta trata e proceso di conscientisacion di e consumidor y companianan.


Sigur e solo echo cu tur Fraccion den Parlamento a aproba e ley aki caba ta inidica e importancia cu ta keda duna na dje. Mi ta termina deseando Minister di Finansas, Economia y Cultura éxito cu e fase di institución y implementacion di ley.


©2020 by Bo Informado