Parlamentario Jennifer Arends-Reyes:

Sectornan tin urgencia pa gobierno implementa accion mirando e situacion cu lo por surgi e proximo lunanan



ORANJESTAD – Como un di e motornan principal tras di e session di brainstorming ‘Turismo den Perspectiva: Scucha, Pensa, Recupera Mihor’, Parlamentario Jennifer Arends-Reyes a expresa su satisfaccion di con e anochi a conta cu e participacion importante di representantenan di e diferente sectornan invita. “Pa nos tabata hopi interesante pa tende di nan mes con nan ta experienciando pa loke ta trata e pandemia cu nos ta aden y con el a afecta nan, tanto di e parti cu nos sa di turismo, cu ta nos economia, y kico nan a trece dilanti como recomendacion,” Arends-Reyes a expresa.


Segun e Parlamentario, e punto principal cu el a tuma nota di dje ta cu sectornan kier wak accion y pronto. Riba termino corto Pais Aruba tin cu busca manera di uni forsa den e region pa impulsa e mercado turistico un poco mas. E comision encarga cu e evento a scucha atentamente na e diferente idea di cu ta ensera innovacion pero tin un parti tambe cu mester wak con pa ‘fast track’ pa por yuda nos Economia den e lunanan venidero. Tambe Arends-Reyes ta indica cu, na nivel internacional, e aspectonan di screening y testing pa e virus, ta loke ta bay defini nos futuro. Ariba e aspecto aki tambe Aruba mester ta bon prepara.


“Nos no por warda mas pa bai sondea mas plan strategico riba corto plazo, pero mester traha pa implementa ayudo urgente y asina Aruba y su Economia por continua cu un tiki rosea mas,” e Parlamentario a finalisa bisando.


9 views

©2020 by Bo Informado