Parlamentario Edgard Vrolijk (MEP): Nos tin un mal cultura di laba man


Hopi biaha gobernantenan no sa kico ta biba den pueblo y hopi no por ni imagina con importante cierto topico por ta un parti di pueblo. Un di nan ta e asunto di tiramento di pisca cu a pasa di generacion pa generacion unda cu den pasado y te dia di awe ta forma parti di ingreso di un grupo grandi di famia. Antes tabata tira pa por tin cuminda na mesa y locual cu sobra tabta intercambia pa entre otro maishi rabo pa por bati un bon pan pa por come cu pisca. Y awo nos hendenan a keda haci e tiramento di pisca aki como fuente di entrada y awo cu Covid-19 hopi di e grupo aki ta sin trabao y ta haci esaki mas frecuente. Hopi di esnan cu ta haci esaki sa e riesgonan, paso hopi di nan mesun famia a fayece door di tiramento di pisca pero e ta algo di nan tradicion y cu si prohibinan, nan lo keda haci’e y lo mihor ta pa regula esaki pa asina por tin mihor bista y mihor control.


Promesa ta mas cu deuda

Pueblo tin añas y mi persona tambe prome cu mi a drenta politica, ta tende politiconan den parlamento ta grita cu bos fuerte cu manera haya oportunidad di goberna lo drecha e problematica di tiramento di pisca. E grupo di gobernantenan aki tin di recordanan cu nos ta haci casi 3 aña den gobernacion y te dia di awe ainda nos no por keda cla cu esaki y a yega momento pa sinta hunto y pa caba cu esaki di una bes por todo.


Cultura di laba man

Mi tin sigur cu a base di mi rueda di prensa di dialuna cu a pasa pueblo lo scucha un bay bin di escusa di parti e gobernantenan cu ta esnan encarga cu e probelmatica di tiramento di pisca entre otro cu gedoogbeleid no ta bon, e landsbesluit no ta bon of e registratieformulier no ta bon. Si nan no ta bon drechanan y busca un solucion pa e problematica aki paso mientras nos gobernantenan si ta cobra, e pueblo eyfo cu ta sin trabao ta riesga nan bida pa drenta lama bruto pa asina por tira pisca pa por tin cuminda na mesa y tambe pa wak si por tira un poco mas pa por bende pa por cumpli cu debernan como tata pa nan yiunan entre otro bay scol. Ban pone cabesnan hunto y ban soluciona e asunto aki ta e mensahe cu mi ta manda pa nos gobernantenan.


13 views0 comments