Parlamentario Darlaine Guedez-Erasmus (MEP):



“Mihor cuida y educa un mucha trempan, cu mester reconstrui un adulto!”


Diabierna ultimo, 26 juni 2020, den un reunion publico a trata algun cambio den nos Codigo Penal pa pa loke ta aumento di castigo maximo di zedendelicten y ahustacion den e verjaringstermijn.

Aki ta trata di un topico hopi delicado y cu tin e sociedad completo hopi preocupa. Durante reunion coleganan a pone enfasis riba articulonan den e ley y añanan di aumento di castigo. E ley y 4 mocionan entrega a keda aproba unanimamente. Loke tambe a hala mi atencion durante e reunion ta cu tur hende den e sala a trece padilanti cu awor ta momento pa pone hopi enfasis riba e parti preventivo pa asina evita cu nos muchanan lo pasa den e situacion aki y cu e abusador por haya oportunidad pa haci muchanan daño.


E Direccion Preventivo

Ta mihor proteha y educa un mucha pa bay bon den su bida, cu mester bay reconstrui un adulto di e dañonan di su infancia. Na prome lugar paso mester balora e bida di cada ser humano, door di brind’e un bida saludabel, es decir cu e por crece y desaroya bon como hende.

Pues di un banda mayornan ta responsabel pa cuida y educa nan yiunan. Pero di otro banda pais mester facilita e mayornan cu mester di extra sosten door di tin instancianan cu mayornan por acudi pa cierto informacionnan y ayudo.

Den mi opinion ta importante pa bin cu programanan structural di con mayornan por concientisa nan yiunan di baby te cu hoben. Duna extra hermentnan asina e mucha por sinti nan mas prepara pa e topico di sexualidad. Alabes esaki tambe por duna e mayornan mas seguridad ora cu nan tin cu papia cu nan yiunan riba e tema aki, segun nan edad.


Conclusion

Aruba a conoce den transcurso di aña hopi caso di abuso sexual. E tabata hopi taboo, famianan hopi biaha no ta papia tocante esaki. Awo personanan ta birando mas conciente cu ta un problema serio y ta tuma un sociedad completo pa combati esaki. Pa informacion tocante prevencion di abuso di mucha por yama Fundacion Respetami na 5824433 of si tin indicacion cu un mucha ta wordo abusa por yama Bureau Sostenemi 5881010.

0 views0 comments

©Bo Informado