Parlamentario Alan Howell:

Nos no por permiti pa nos derechonan constitucional wordo trapa



Diamars mainta Parlamento a reuni cu diferente minister di Gabinete Wever-Croes pa scucha for di nan e condicionnan cu Hulanda kier impone pa Aruba por haya placa fia for di nan.

Parlamentario Alan Howell a indica cu e situacion cu Hulanda kier impone riba nos ta totalmente anticonstitucional y ta manda nos bek na e tempo colonial unda ta Hulanda ta dicidi, poniendo nos estado di autodeterminacion y nos Status Aparte totalmente un banda. E posicion aki el a presenta den Parlamento y a pidi su coleganan parlamentario pa lubida color politico y para hunto pa nos autonomia y bisa Hulanda cu nos ta contra di nan imposicionnan.

Pa colmo gobernantenan no mag di comparti cu Parlamento e exigencianan cu nan kier pa Aruba cumpli cu nan, es decir, nan ta kier pa Gobierno viola nos democracia parlamentario. “Mi ta wonder kico Tweede Kamer na Hulanda lo haci si nan djis insinua cu nan lo wordo bypass?”.

No solamente esey, Hulanda kier pa gobierno acepta dos rijkswet diabierna awo siendo cu ta apenas dialuna esakinan a wordo ricibi. Nan kier e cambionan di biaha sin cu por mira kico e consecuencianan di e cambionan (secreto ainda) aki por significa pa nos isla y nos hendenan. Nan kier impone dos rijkswet sin cu Parlamento por ta na altura di kico nan ta, sin cu gremionan y pueblo sa kico esakinan ta encera, es decir, nan ta promulga bon gobernacion, pero kier pa Aruba bay liña recta contra bon gobernacion.

“Esaki ta algo inaceptabel pami y manera mi por a scucha di mi coleganan parlamentario, ta algo inaceptabel pa nan tambe. Nos no lo acepta sin mas cu nos derechonan ta wordo trapa, mucho menos haciendo uzo di un crisis mundial y cual a hinca nos pais den un situacion hopi precario. Nos lo sa di laga nos diferencianan politico un banda y uni pa demostra cu nos hendenan, nos Arubianonan por ta amabel y amigabel, pero no lo permiti pa nos derechonan wordo lastra. Nos deber y obligacion como parlamentario ta pa sali na vanguardia di nos pais, nos Arubianonan y tur ciudadano den tur sentido”, Alan Howell a finalisa.


6 views

©2020 by Bo Informado