PA PARA E TSUNAMI BERDE/GEEL, TA IMPORTANTE PA UPP TA UN FORZA DEN PARLAMENTO DI ARUBA!


Dia 25 di juni proximo Aruba lo bay urna electoral pa scohe su representantenan den Parlamento pa e siguiente 4 añanan. E motibo di e eleccion adelanta ta retiro di e gobierno. E retiro no tin nada di haber cu integridad, manera e lider di e partido kier laga nos pueblo kere. E cambio di e fecha di e eleccion a sosode di un forma premedita cu e unico proposito pa e partido trata na influencia e resultado di e eleccion adelanta na nan beneficio door di perhudica un preparacion optimal di principalmente e partidonan chikito. Prueba di cu ta trata di un acto premedita ta e propaganda di partidonan tradicional grandi cu ya caba a subi caya.


E motibo principal pa adelanta e fecha di eleccion tin di haber sinembargo cu kier logra un mandato absoluto. UPP ta conclui esaki basa riba expresionan cu a sali den coro di AVP y MEP. Nos pueblo a experiencia caba cu gobernacion di mayoria absoluto, esta di un solo partido, particularmente esun berde a demostra di tabata uno fatal. A endeuda nos pais na un forma nunca bisto y pakico, pasobra e parlamento a prefera di asumi e rol di "cheerleaders". Ora a pensa di lo encontra un gobernacion cu solucion, manera a priminti durante eleccion pasa, a resulta di ta mesun mediocre cu e gobierno anterior. P'esey no por permiti un gobierno geel ni berde basa riba un mayoria absoluto.

UPP ta kere cu e situacion actual na Aruba ta rekeri un gobernacion di coalicion cu un parlamento critico. Nos pueblo por a experencia cu UPP den ultimo 4 aña a "talk the talk and walk the walk", apesar di no tin representacion den parlamento. Nos a desenmascara falta di un maneho segun reglanan di bon gobernacion y a adverti pa actonan coruptivo cu tabata tuma lugar, mientras e gobierno y parlamento tabata prefera di waak e otro banda. P'esey UPP ta participa na e siguiente eleccion cu e intencion pa sigui cu un postura critico cu e unico proposito pa defende interes di nos Pais y su hendenan. Den nos democracia ta importante sinembargo pa tin representacion den Parlamento, pa asina por cumpli cu e deber pa regla nos cosnan na cas prome.


Pues ta den man di nos pueblo pa percura pa por medio di UPP crea un FORZA cu por para e Tsunami berde/geel. Ta awor of nunca, sino e Tsunami aki lo destrui nos por completo.

Den contacto cu pueblo y tambe loke ta sali riba medionan social, nos por sinti cu gran parti di nos pueblo critico no tin confiansa mas den e partidonan tradicional. Pa por cambia e forma cu e partidonan tradicional ta haya asiento, mester bin cu un cambio di e sistema electoral, particularmente e asunto di reparticion di “restzetels”. Esaki ta algo sigur cu partidonan tradicional no kier mira cambia ya cu den cierto sentido esaki ta loke ta haci cu nan por keda na poder. Pues e cruzada cu nos ta aden ta undo hopi importante y cu nos mester percura pa nos haci un bon escoho e biaha aki.

UPP su punto di salida ta cu ya cu Aruba ta den un crisis financiero, economico, estatal y di salubridad formal, cu lo mester bin cu forma di Gabinete di Crisis. Un gabinete cu tin di bay atende cu esakinan den un forma specifico y cu tareanan bon defini. Gabinete aki lo mester ta conforma dor di expertonan cu no tin un vinculo directo cu politica, pero na unda cu Parlamento na su turno lo tin e control maximo riba nan. Al final ta un Parlamento pueblo ta scohe y biniendo cu e gabinete aki, e gabinete no-politico aki lo mester tin e blessing di Parlamento completo. Den termino di un aña e ministernan en cuestion, mester percura pa atende cu e crisisnan specifico, mientras na mes momento nos ta traha na un UNION y COMPROMISO NACIONAL, cu mester percura pa crea e confiansa bek bou nos pueblo y tambe cerca Hulanda, pa asina nos por tin un negosacion serio cu Hulanda pa por haya ayudo real y tambe elemina e entidad colonial cu yama COHO y RAFT.


Pero importante ta pa nos cuminsa na cas prome y djey sigui na nivel di Reino, na unda hasta lo mester cuminsa papia pa drecha nos relacionnan estatal den Reino Hulandes. Esaki e.o. UPP ta ofrece den su REBOOT ARUBA 2.0, unda nos recupera nos autonomia, nos re-inventa gobernacion y re-establece orden den nos pais, pa un MANECE NOBO PA ARUBA!

3 views0 comments