Pa fin di aña 3 scol lo ta riba caya


Diahuebs mainta fraccion di AVP a tene su conferencia di prensa y esaki a tuma luga dilanti di ex edificio di VAD Drukkerij, den cual tin tres col ubica cu ta Frere Bonifacius, St Aloysius School y un dependence di Maria College cu mester a expande su facilidadnan.

Lider di fraccion di AVP, sr Marlon Sneek a mustra cu informacionnan cu fraccion di AVP ta sigui haya for di e sector di enseñansa, ta cu tres scolnan menciona, mester a muda na apertura di aña escolar nobo.

Sinembargo ora cu protestanan a lanta contra di e decision aki, Minister di Enseñansa, Rudy Lampe a suspende su decision pa un rato pero awor ta surgi informacionnan persistente cu pa dia 31 di December proximo, lo ta ultimo dia di e muchanan di e scolnan menciona na e localidad aki.

“Mientras cu e decision aki ta riba mesa caba segun informacionnan nos a ricibi, te dia di awe e muchanan aki no sa na unda nan tin cu sigui scol, na unda lo bay reubica nan ya cu simplemente Minister a manda avisa cu pa dia 31 di oktober e contract di huur di e edificio ta caba y e tres scolnan tin cu mira na unda nan bay hiba e studiantenan.

E decision di minister aki pa fraccion di AVP ta un decision descabeya pero nos ta custumbra caba cu e Minister aki ta haci cosnan for di sla.

Pa colmo algun dia pasa nos a tuma nota di un conferencia di prensa di Scol Paso Pa Futuro caminda a bin dilanti cu Minister Lampe a priminti e scol algo pero den mesun rosea e no ta cumpliendo cu loke su persona mes a priminti.

Algo cu no ta nada nobo cu e Minister aki, pa fraccion di AVP ta algo preocupante ora cu nos mira cu akinan nos ta papiando di sigur di mas di 350 mucha kendenan no sa na unda nan educacion ta bay sigui.

Mesun cos nos por a mira na Dakota Shopping Paradise caminda tambe tabatin ubica Imelda Kleuter School y Minister Lampe a dicidi di para e huur di esaki y e muchanan di kleuter aki ta na cas, hayando les na cas pa motibo cu nan edificio mes no ta cla.

Cu otro palabra y ta bisto pa henter pueblo, cu Minister Lampe no ta planea nada, gewoon hisa benta y mesun situacion aki tin na Colegio San Jose na Santa Cruz caminda Minister ta cla pa elimina e klasnan modular cu el a laga buta den e cura di scol, pero e edificio cu e mester a traha nobo no a wordo termina ainda.

Contratista di e proyecto aki a dicidi di para trabounan pa motibo cu Minister no ta pagando e contratista, pues un desaster total cu ta tumando luga den enseñansa aki na Aruba.

Banda di esaki Parlamento di Aruba tabatin un reunion publico cu fraccion di AVP a yama y motibo di a yama e reunion publico aki, tabata pa manda Minister Lampe cas mirando e desaster cu el a bin ta hibando cu su maneho,” lider di fraccion di AVP, sr Marlon Sneek a trece dilanti.


10 views

©2020 by Bo Informado