No por ignora efecto di crisis riba mercado laboral


Aruba lo ta pasando den un recuperacion hopi lento pa loke ta turismo y economia, segun Parlamentario pa fraccion di AVP, mr. drs. Richard Arends a declara durante conferencia di prensa diahuebs mainta. “Un recuperacion cu lo tin efectonan pa loke ta e parti economico, comercial y seguramente laboral. Ya caba nos a mira empresanan estatal ofreciendo paketenan na nan trahadornan y empresanan mediano y chikito cu a logra wanta cabes riba awe durante e prome brote di contagio, ya no tin perspectiva,” e la bisa.


Aruba no conoce un sistema di seguridad social cu por sostene tur esunnan cu perde nan trabou. E ta di opinion cu Gobierno mester cuminsa atende cu e aspecto laboral aki y hiba un dialogo hunto cu sector priva pa hunto maneha e situacion aki y posiblemente con ta re-aloca e hendenan aki den otro areanan di nos economia. “Mescos cu na Hulanda y otro paisnan cu ta duna sosten financiero na sector priva, seguramente e subsidio di salario cu ta wordo paga via SVb lo mester wordo adapta pa asina empresanan haña espacio pa restructura. Pago di salario ta un tipo di gasto cu un empresa tin y si no tin entrada, dificilmente por keda manete e negoshi.”


Parlamentario Arends ta sinti cu Gobierno ta evitando di tin di atende cu a tema aki. E ta spera cu pronto Gobierno por yega Parlamento pa hasi e preguntanan al respecto, e.o. riba e rol cu gobierno ta hunga den e mercado laboral di e ‘normal nobo’. Anteriormente e Parlamentario a hasi un distinccion entre sosten financiero y sosten economia. “Sosten financiero ta sumamento importante awor y den e futuro sercando. Mesun importante ta e sosten economico den e proximo lunanan nos dilanti y te hasta añanan nos dilanti ora cu nos lo por papia di un recuperacion economico manera cu nos a conoce prome cu e pandemia.”


Richard Arends a sigui mustra cu e proceso di recuperacion tambe ta wordo impedi pa falta di un posicion concreto pa loke ta trata Hulanda, caminda e incertidumbre aki tampoco ta yuda cualkier desaroyo cu lo tin pa e isla y mas mas e ta atrasa esaki. Fraccion di AVP siman pasa tabata den parlamento caminda un biaha mas gobierno a keda sin fiha un posicion pa loke ta trata su posicion cu Hulanda, e dos Rijkswetnan cu ta riba mesa. “Gobierno ta bayendo rond Aruba pidiendo opinion di tur hende, di gremionan, di lidernan politico y di gremio comercial, pero gobierno mes no ta fiha un posicion unda e ta para pa loke ta trata esaki y kico nan tin pa atende cune y pa premira riba dje,” Arends a termina bisando.



6 views0 comments

©Bo Informado