NO PARA UN BANDA PERO JOIN UPP SI ABO TAMBE TA FADA DI TANTO MENTIRA Y PROMESANAN FALSO


UPP ta bay participa na su di tres campaña electoral. E miembronan di UPP, manera por ta hopi lo a spera, no a pensa ningun momento pa tira e serbete den ring pa motibo di e resultadonan marginal cu e partido a ricibi di e electorado e ultimo dos eleccionnan. Alcontrario e miembronan ta convenci cu participacion di UPP den e siguiente eleccion awor mas cu nunca ta necesario. E motibo ta cu UPP ta considera cu e futuro di nos pais, nos autonomia, nos orguyo patrio ta na peliger. E siguiente eleccion tin un nificacion trascendental, ya cu Aruba ta na un CRUZADA!


E ta un momento di reflexion si nos ta vota pa e mesun forma descabeya cu nos a wordo goberna e ultimo 12 aña of si nos tin ecurashi y determinancion pa para e politica di engaño, manera a sosode den e añanan cincuenta door di sr. Juancho Yrausquin d.f.m. y den añanan setenta door di Betico Croes d.f.m.

E pueblo a duna e dos estadistanan un apoyo masal pasobra a kere den e palabra y compromiso cu nan a profesa y presenta na pueblo. E confiansa y apoyo no tabata envano, pasobra e dos estadistanan a cumpli cabalmente cu nan palabra. Tur dos a entrega nan alma y hasta nan bida na cumplimento di nan promesa na pueblo, un diferencia grandi di loke nos pueblo ta wordo confronta cu n’e awendia den politica. Politica a para bira un arte di engaño y no un arte den representa e pueblo dignamente a base di transparencia, honestidad, profesionalismo y humildad.

UPP a bin ta boga pa e ultimo decada pa un cambio drastico y structural den e forma cu politica y gobernacion ta wordo maneha riba nos Isla. Nos mensahe sinembargo no a logra di convence un parti di nos electorado pa duna UPP un mandato concreto pa medio di un of mas asiento den parlamento. Nos ta respeta e opinion di nos pueblo. UPP ta spera cu e biaha aki nos pueblo tambe ta harta di tanto mentira y promesanan falso y cu awor si lo sa di duna UPP e apoyo necesario pa cumpli cabalmente cu nos intencion pa restablece un gobierno cu ta cumpli cu tur reglanan di bon gobernacion.

Pakico kere UPP y Booshi Wever? Booshi Wever ta compromete su mes di NO lo aspira pa bira minister, si encaso esey lo por ta un posibilidad, pero di keda representa pueblo den Parlamento. Parlamento mester haya su lugar back como e organo mas halto di nos Estado di Derecho, fuerte y cu ta cumpli cu e tarea pa controla e gobierno na turno. Booshi Wever ta compromete su mes di representa henter e pueblo di Aruba, pero principalmente e parti Pariba di Brug y muy en particular San Nicolas. Booshi Wever y UPP no lo acepta mas promesanan falso cu nunca ta wordo concretisa ora ta toca San Nicolas. Aruba y San Nicolas merece mihor y pueblo por ta convenci cu UPP den Parlamento lo percura pa cumpli cu su compromiso. UPP ta boga pa un REBOOT ARUBA 2.0 y den esaki, pa crea e balanza y involvimento di un Aruba completo, San Nicolas tambe mester ta parti di esaki! San Nicolas tambe mester un REBOOT y cu e bolbe bira e parti cu mester yuda Aruba sali for di e crisis actual.

Si bo tin ideanan of kier ta parti di e team di UPP, por tuma contacto cu nos na upp.unista@gmail.com of por haya nos riba facebook.

0 views0 comments