No mester 14 pa goberna pasobra bo por goberna cu 11


ARUBA MESTER UN GOBIERNO STABIEL PA RECUPERA

“Ora bo ta papia di stabilidad, no ta solamente e programa ta importante pero tambe e persona”


Den su declaracionnan haci despues di a sali di e reunion cu informadornan, Lider di MEP, sra. Evelyn Wever-Croes a bisa cu Partido MEP prome cu campaña tabata tin un indicacion caba di partidonan politico y kico MEP tin na cada Partido. Partido MEP sa y concoce algun caba y nan a logra haña voto y esey ta decision di pueblo cu mester respeta.

Sra. Evelyn Wever-Croes: “Mi a tende lidernan politico bisa cu mester di 14 asiento ya cu tin leynan pa cambia. Na e momento aki e leynan di landspakket no ta exigi 14 voto. Tin algun ley si cu nos kier cambia manera nos a purba di ancra e Ombudsman den nos constitucion y lo tabata tin mester di 14 voto pero no tabata tin. A para esaki pero lo sigui cu ne y asina riba e temanan bo por purba yega na e puentenan pa yega na e 14. Bo no mester 14 pa goberna paso bo por goberna cu 11.

Biaha pasa nos a bay cu 12 den gobernacion paso nos kier a busca e base mas grandi posibel pero e no a duna nos ni e stablidad ni e trankilidad. Aworaki nos focus ta stabilidad, no tanto cantidad sino stabilidad.

Aworaki nos ta wak unda cada partido ta para, cua ta e puntonan cu bo ta para leu di otro y con bo por crusa e brug ey pa bo por traha un puente eyriba. E berdad ta cu ora bo ta papia di stabilidad, no ta solamente e programa ta importante pero tambe e persona. E mester tin e cabes pa bay contra tur e retonan pasobra ta presion grandi ta bin. El a bin caba y e lo sigui bin pasobra nos no a sali di e pandemia ainda.

Ora bo tin Hulanda ta pone presion y esnan cu bo tin cu paga fiansanan internacional bek, presionnan interno di bo propio trahadonan, sindicatonan of di otro veld manera enseñansa, salubridad entre otro, bo mester ta para duro den bo sapato cu un smile riba bo cara y prepara pa ofrece un solucion”.

44 views0 comments