No inverti pa duna hende trabou so pero inverti den prevencion di berdad


Parlamentario Robert Candelaria


Robert Candelaria miembro di fraccion di AVP, a mustra cu aña 2021 a habri cu 3 asesinato den apensa 15 dia di tempo y lamentablemente, tur indicacion ta mustra cu tur 3 caso serio aki, tin hendenan hoben envolvi.


Segun señor Candelaria, a tende di polisnan, cu pa husticia y e arena social e aña nobo no a cuminsa bon, cu hopi caso di problema social riba tur nivel.


Problema entre pareha, problema entre mayor y yiu, entre hende cu conoci di otro y tambe esunnan cu ni conoce otro mes.

“Na luga di investiga kico ta pasando y con pa deal cu e situacion, nos ta mira cu politica tradicional ta traha duro contra cambio pa mehoracion, caminda ta sigui cu instiga y polarisa, na luga di soluciona.


Na comienso di e periodo di gobernacion actual, nos a mira e caso cruel cu a tuma luga cu morto di 2 criatura cu a shock Aruba formalmente y esaki a bira algo cu a pone hopi pensa unda nos ta bayendo como sociedad. Algo asina bo ta tende di dje antes talbes cu ta pasa na otro pais, pero no aki na Aruba y lamentablemente hopi a lubida caba y nada a cambia.


Algun a converti esaki den un issue politico y culpa e gobierno anterior siendo cu e rais ta hopi mas profundo, caminda asina por sigui menciona diferente ehempel con cada persona y cada grupo a interpreta loke a pasa pa nan mes y con cada un a pensa cu mester atende cu esaki.


Nos ta di opinion cu awor mas cu nunca nos pais mester para keto y refleha, mester di estudio pa analisa realmente kico ta pasando, tin un aumento real den problema social den nos sociedad y si esey ta e caso, con grandi y con grave e ta?


E issue aki ta mucho grandi y mucho importante pa e ta djis un instrumento politico of un forma pa haña mas placa pa e field, sin un plan kico e field mester haci cune.


Manera mi tabata bisa den pasado, ora un hende tira un atraco, e no ta wak prome ken ta Minister di Husticia, pero e ta simplemente tira su atraco y den e arena di problemanan social ta mesun cos.


E hende cu pleita of bringa cu otro no ta bay wak ta cua Minister of cua gobierno ta na mando y ta ridiculo pa pensa asina y tog tin algun cu ta haci’e. Mester busca e rais y atende cu e problema den su origen.


Gabinete Wever Croes a bin cu e Sociale Crisisplan y nos semper a bisa cu ora algo ta na bienestar general, nos lo sostenepero segun aña ta pasa, nos por mira cu e resultadonan di e fondo di crisis social no ta suficiente visibel.


Nos sa cu tin hopi profesional trahando duro y tog tin pregunta over e resultadonan y awor nos sa tambe cu cambionan social ta tuma tempo pero hopi ta puntrando nan mes, si e fondo aki so ta e solucion?


Por ehempel, nos mester puntra nos mes si: Soluciona problema social sin traha pa e persona tin placa pa pone pan riba mesa ta yuda cu algo?


Situacion social mester di un balansa entre e yudansa pa un stabilidad financiero den cada hogar y e subsidio pa e fundacional social. No por tin uno sin e otro.


E Minister di Husticia a priminti di combati high impact crimes y e uso di helikopter pero mi ta kere cu nos ta mira cu crimen cu hopi impacto negativo y doloroso ta aumentando atrobe.


E helikopter no a duna e frutanan desea y laga nos cambia e rumbo te ora nos mira maneho cu si ta yuda di berdad,” Parlamentario Robert Candelaria a declara.

Aña di eleccion a yega y campaña ta bay bira interesante e biaha aki.


Nos sa cu tin un gobierno na mando cu a priminti hopi pero no a cumpli cu e promesanan aki.


E biaha aki nan a haci’e mas dificil pa nan mes, pasobra no ta pueblo so ta wak awor ya cu Hulanda tambe y niun gobierno lo no por haci nada cu Hulanda no aporba.

Mi a nota cu den campaña anterior hende ta gusta tuma idea cu nos presenta y haci manera ta nan idea.


Laga nos haci e trabou mas facil pa nan e biaha aki. Si otronan copia loke ta bon, laga nan copia esaki cu lo ta hopi bon pa Aruba. Laga nos tur ban concentra hunto riba preveni criminalidad!

Tanten cu politiconan ta sigui bringa cu otro, e pais ta sigui bay atras. Nada di idea nobo no ta wordo treci dilanti, pasobra tur energía ta bay den tira lodo.


Mi kier invita tur colega di tur partido pa nos haci e campaña aki diferente. Ban wak kico realmente ta bon pa e pais, ban papia cu pueblo y scucha kico ta biba den nan y ban traha positivamente pa bay contra di tur desaroyo robes cu nos ta mira den nos comunidad.


Ban inverti den tackle problema social realmente.

Ban inverti den estudio di kico realmente ta e condicion social di nos pais.


Ban wak unda mester cambia cos y unda e ta bayendo bon caba.

No inverti pa duna hende trabou so, pero pa preveni di berdad.


No pa traha palabra y concepto nobo bunita cu pueblo no ta compronde kico bo ta papiando, pero pa yuda nos siguiente generacion cambia rumbo y haña perspectiva.


Ban stop di papia un cos y hasi otro. Duna bon ehempel.


Sigui polarisa, sigui negativamente atacando otro, ta djis mustra cu bo no tin abilidad pa pensa positivo y no por bin cu solucion real. Solucion no ta bin cu eliminacoón di otro pero e ta bin dor di colaboracion cu otro,” Robert Candelaria di fraccion di AVP a mustra.

2 views0 comments

©Bo Informado