Minister Xiomara Maduro y Minister President Evelyn Wever-Croes a reuni cu CAFT riba varios topico

E recorte den AZV ta keda punto di preocupacion





ORANJESTAD - Recientemente Minister Maduro hunto cu Minister President a reuni cu CAFT riba nan trabounan di supervision financiero di Aruba. A trata diferente topico, entre nan, ehecucion di presupuesto 2020, maneho financiero, recorte den AZV, sosten financiero, y situacion na Serlimar. Regularmente e mandatarionan ta reuni cu e miembronan y e secretariado di CAFT pa asina por brinda e informacion necesario pa e trabou na bienestar di Aruba por wordo haci na un manera eficaz.




‘Recorte di 5 miyon pa luna den gasto AZV ta keda un preocupacion di Gobierno’


Un tema cu ta keda un preocupacion di e mandatarionan ta e recorte den AZV. Un di e prome condicionnan cu Conseho di Reino a impone pa Aruba yega na remarca pa fiansa pa surpasa e crisis di COVID19, tabata un recorte di 5 miyon florin pa luna den gastonan di AZV. Apesar cu for di banda di Gobierno a cuestiona e condicion aki di corta den gasto di salubridad memey di un pandemia, Gobierno a cumpli den aña 2020 cu e condicion aki. Na e momento eynan e tabata crucial pa Aruba haya e fiansanan necesario pa yuda comunidad surpasa e crisis. Pa aña 2021 tambe e recorte aki di 60 miyon florin ta keda como un condicion y esaki ta trece preocupacion y inquietud grandi cune. Principalmente pasobra te ainda no tin un splicacion ni di Ministerio di Asunto Interior di Hulanda, ni di Conseho di Minister di Reino y tampoco di CAFT pa e suma di recorte aki. CAFT ta conseha Conseho di Minister di Reino riba e punto aki tambe y pesey den e reunion Minister President a bolbe pidi un splicacion di CAFT riba nan recomendacion pa corta den salubridad di Aruba memey di un pandemia.




‘IMF tambe preocupa pa recorte den AZV’


E topico di e recorte grandi aki den gasto di AZV sin un splicacion debido tambe a hala atencion di IMF kende nan e ultimo dos siman a haci un evaluacion financiero y economico di Aruba via su 'Article IV mission.' Segun IMF mester tene hopi cuidou pa no debilita e cuido medico net awor cu Aruba ta na man di un pandemia sin precedencia na mundo.




‘Te ainda no tin un splicacion conciso pa e recorte di 60 miyon den aña 2021’


Den e reunion cu CAFT e mandatarionan no por a haya un splicacion conciso dicon den aña 2021 tambe ta necesario pa corta 60 miyon florin den gasto di AZV. A splica cu e sector medico a reuni pa asina por bin cu un propuesta con pa aplica recorte den gasto di AZV, pero djies corta 60 miyon den salubridad sin un splicacion y memey di un pandemia ta algo cu ta keda inexplicabel.


5 views0 comments