Minister Xiomara Maduro ta informa:

Aruba ta preparando pa e evaluacion door di Caribbean Financial Action Task Force (CFATF) di e integridad di e sistema financiero na augustus di 2021


Aruba mester percura pa preveni y combati labamento di placa y financiamento di terorismo



ORANJESTAD - E siman aki a tuma lugar un reunion di e Comision di Guia cu ta na cabes di e trabounan cu ta wordo haci na nos Pais pa mantene e sistema financiero di Aruba liber di labamento di placa y financiamento di terorismo. Pa e reunion aki tabata presente tambe Minister President Wever-Croes, Minister Bikker y Minister Maduro. Aruba ta den pleno preparacion pa e evaluacion door di Caribbean Financial Action Task Force on money laundering (CFATF) di nos sistema pa preveni y combati labamento di placa y financiamento di terorismo. E evaluacion lo tuma lugar cu un 'onsite visit' den luna di augustus 2021 y e comision di Aruba ta trahando duro pa asina por demostra e esfuersonan cu ta wordo haci pa por mantene e integridad di e sistema financiero di nos Pais. Dentro di poco e Comision di Guia lo reuni cu tur 'stakeholders' pa asina presenta e resultado di e 'National Risk Assessment' (NRA) cu a keda compila danki na e 'input' di varios instancia na nos Pais. E NRA lo bay desemboca den un strategia pa asina por preveni y combati labamento di placa y financiamento di terorismo na un manera mas efectivo na nos Pais.


4 views0 comments

©Bo Informado