Minister ta exigi cabes di miembronan di Hunta di Supervision


Parlamento di Aruba tabatin un reunion publico cu fraccion di AVP a yama, segun lider di fraccion di AVP, sr Marlon Sneek, y motibo di a yama e reunion publico aki, tabata pa manda Minister Lampe cas mirando e desaster cu el a bin ta hibando cu su maneho.

Hopi inseguridad pa tanto alumno- y maestronan, discusion riba posicion huridico di entre otro werksternan y cantidad di otro problemanan cu Minister Rudy Lampe a bin ta ocasionando cu su maneho sin pia ni cabes, miembro di .

Sr Sneek a mustra cu den concepto di AVP e tempo ey, Minister Lampe tabata causando daño den enseñansa y mocionnan cu a wordo presenta den e reunion aki y no ta uno of dos pero tres mocion contra di e maneho di e minister aki.

“Entre otro mocionnan cu a bin dilanti ta entre otro pa papia riba e werksternan di SKOA, kendenan pa hopi aña a wordo no corectamente paga.

Ora cu na 2015 a trek esaki recht, a bin c’un ‘Ministeriele beschikking’ pa percura pa e werksternan aki tambe haya e trato cu nan mester haya pero Minister Lampe a bin y na luga cu e caba cu e trabou, dor di cambia e ministeriele beschikking y pone esaki den un ‘Landsbesluit’ manera ta poni den e ministeriele beschikking.

E ministerele beschikking tabata pa cuminsa atende cu e situacion y di eynan bay over na haci e parti di wetgeving pa e Landsbesluit ta cla pa garantisa e placa di e trahadonan aki, Minister a sorprende tur hende dor di bay over na para e proceso aki.

Den e discusion cu tabatin den Parlamento, parlalemento a dicidi cu e plan di Minister Lampe no tabata por y a bay over na entrega tres mocion pero Minister a bira bisa cu ningun hende lo perde trabou, cu e rumor aki no ta berdad y cu esaki ta un mentira grandi.

Awe por mira cu Minister Lampe ta manda cobra SKOA tur e placanan cu a paga pa e werksternan aki pa loke ta e sociale lasten, pues AOV, pensioen, AZV, pues awor di repente SKOA ta bin haya su mes c’un debe di 8.5 miyon florin.

Un suma di 8.5 miyon cu SKOA no a hinca den su caha pero cu SKOA a paga na belastingdienst pa mesun trahadonan aki, pues Minister Lampe a keda riba mesun cabay y haciendo mal uso di su posicion como Minister, pa intimida den e caso aki Obispado, bou di cual SKOA ta cay, caminda Minister ta bisa cu e no kier mira e miembronan di Hunta di Supervision di SKOA mas.

Cu e ta duna te diabierna pa Obispado core cu miembronan di e Hunta di Supervision y esey ta e Minister di Enseñansa, esey ta e gobierno transparente cu nos tin, cu ta respeta tur hende cu ta duna transparencia, ta duna espacio y ta dialoga pero awe ta buta cuchiu riba mesa.

Ta haci mal uso dor di cobra un placa for di 2015 bin te cu e aña 2020 cu SKOA lo ta debe 8.5 miyon florin pa motibo cu nan lo a haya e placa aki ‘ten onrecht.’

Placa cu SKOA a usa pa paga e sociale lasten di e 97 werksternan, pues e trabou di e 97 werksternan aki ta den wega ainda y awe minister di enseñansa ta ratifica esaki na momento cu e manda cobra e suma aki caminda practicamente e ta bisa cu gobierno no ta bay subsidia e suma aki pa garantisa e placa di e werksternan.

Riba dje e minister ta pone cuchiu riba mesa pasobra e Hunta di Supervision aki no ta laga e minister haci loke cu e kier, en minister kier pone presion riba Obispo pa bula nan cabes y e cos aki ta inaceptabel.

No por ta asina cu placa cu a wordo usa pa paga sociale lasten di e trahadonan, y no lubida cu loke SKOA ta haci un administratie, manda esaki pa departamento di finansa y e departamento aki ta esun cu ta paga e trahadonan.

Pues SKOA niun dia no a haya un cen preto, ta un papel a bay pa loke nos ta haya PSA cu ta e personeelstaat pa e ora e departamento di finansa contrla e loonstaat aki, wak si e ta klop entre otro si no ta dunando un trahado cen di mas, si overtime ta bon calcula cu tur otro cos y e ora departamento di finansa ta bay over na paga e trahadonan. Kiermen cu SKOA ningun dia a haya ni un depchi te pa awe Minister bisa cu e ta bay cobra SKOA 8.5 miyon florin, pues un minister manipulado cu ta haci mal uso di situacionnan y ta pone presion pa bula cabes di hendenan cu no ta baila manera cu e minister ta toca, cu ta bise kico ta regla y kico ta e cosnan cu e mester tene cuenta cune,” Parlamentario Marlon Sneek a declara.




24 views0 comments

©Bo Informado