Minister Plenipotencario di Aruba na Washington DC Joselin Croes:

E GOBIERNO MERICANO TA PARA E RESTRICTION IMPONI SIMAN PASA RIBA STUDIANTENAN INTERNACIONAL CU NAN LESNAN TA FULL ON-LINE 


Minister Plenipotencario di Aruba na Washington DC Joselin Croes ta informa tur studiante di Aruba cu tin intencion pa bin studia na Merca of cu ta studiando na Merca pa tuma nota cu ayera 14 di juli, 2020, e Administracion di Presidente Trump a para e desicion tuma siman pasa di no duna Visa na studiantenan cu nan scol ta 100% on-line. 

Despues cu Harvard University y Massachusetts Institute of Technology a lanta un caso contra e Administracion di Trump pa e desicion pa nenga Visa y of kita Visa di tur studiante internacional cu nan lesnan ta 100% on-line, un cantidad di 300 otro universidad di Merca a uni nan mes na e caso legal aki y a vocifera cu e desicion aki tin un impacto negativo no solamente pa e studiante internacional pero tambe pa e scolnan cu ta depende di e entrada di tur e studiantenan aki. Alabes nan a mustra riba e hecho cu e desicion aki lo oblige nan pa duna les en persona cual lo subi e risico di contagio di COVID 19. Hues Allison Borroughs a duna di conoce cu e Administracion di Presidente Trump a retracta nan desicion tuma siman pasa y lo bay over bek na e maneho bieuw. 

Minister Plenipotencario Joselin Croes a subraya cu na Merca tin mas di 1 miyon studiante internacional cu lo a keda afecta door di e regla nobo aki imponi siman pasa. E desicion aki a crea un alivio grandi pa hopi studiante cu direpente tawata den un incertidumbre grandi pa cu nan futuro. En todo caso esaki significa cu tur studiante di Aruba cu ta studiando na Merca of tin intencion di bin studia na Merca por haci esaki trankilamente hasta si nan lesnan ta 100% on-line.


10 views0 comments

©Bo Informado