Minister Glenbert Croes ta anuncia:

Deadline pa por prolonga of aplica pa FASE ta 15 di augustus



Fondo di Asistencia Social di Emergencia conoci como FASE ta yegando su final. Esey e mandatario a anuncia durante un rueda di prensa. Dunando un relato extenso na Prensa di Aruba, e mandatario a informa cu FASE ta den su ultimo dos lunanan. Y cu si anteriormente e extension a bay automaticamente, e biaha aki tin un cambio y esey ta cu mester aplica pa prolongacion pa por ricibi e ultimo dos lunanan di FASE.

Motibo principal di e cambio aki ta cu ta yegando hopi informacion na e Helpdesk di FASE, cu tin hendenan cu a reanuda nan trabou cu ainda ta cobrando FASE. Pero manera tur hende sa: FASE ta pa hendenan cu a perde entrada por completo. Pues si bo ta riba Loonsubsidie bo no por haya FASE. Si bo ta bek na trabou cu un salario menos di locual bo tabata gana anteriormente, bo no por haya FASE y aki ta unda kier haci e control debido mediante aplicacion pa prolongacion.


E ultimo dia pa aplica pa prolongacion ta 15 di augustus. Riba e website di www.fasehelpdesk.com ta click riba e bara di “prolongacion trahado” of “prolongacion ZZP”. Ta yena e formulario, upload e documentonan pidi, contesta e preguntanan obligatorio y ta registra.

Di otro banda, pa esunnan cu ta aplicando pa prome biaha, e deadline ta 15 di augustus tambe. Y en vista cu FASE ta termina fin di September, e aplicantenan nobo lo haya FASE dos luna so semper y cuando ta cumpli cu tur rekisito.


Kico lo ta e proximo etapa despues di FASE ainda mester wordo defini pa Gobierno di Aruba. Tin diferente scenario cu ta evaluando pero uno definitivo ainda no tin, pa motibo cu tin e negociacionnan cu Hulanda andando pa Aruba por finalmente ricibi e ayudo financiero cu e mester di dje pa Aruba por sobrebibi y sobrepasa e crisis financiero aki nunca antes bisto.


Glenbert Croes

4 augustus 2020


17 views0 comments

©Bo Informado