MINISTER DI FINANSA: PRESUPUESTO 2021 DI PAIS ARUBA PRESENTA DEN UN FORMATO INNOVATIVO



Oranjestad – Recientemente Minister Xiomara Maduro a haci entrega di e Presupuesto di Pais Aruba 2021 na Presidente di Parlamento, sr.Juan Thijzen. Durante un conferencia di prensa e mandatario a elabora riba e Presupuesto 2021 di Pais Aruba.

Presupuesto 2021 den un formato innovativo

Minister Maduro ta informa cu pa di dos aña consecutivo e Presupuesto 2021 ta wordo entrega na un forma digital pa asina e Parlamentarionan por haci nan trabou mas eficiente. E mandatario a splica cu

a presenta un documentacion cu ta visualisa e informacionnan necesario di e Presupuesto 2021 na un forma eficiente y innovativo pa asina por trata e Ley mas importante di Pais Aruba. E visualisacion di Presupuesto 2021 ta pa na un manera interactivo y pa medio di ‘dashboard’ por haya un bon bista di e structura di e Presupuesto. Edocumentacion ta contene e resultado di presupuesto, entradanan y gastonan di Presupuesto 2021. Alabes por haya e informacion financiero di cada un Ministerio y pa cada sorto di gasto, informacion tocante di e Debe y GDP di Pais Aruba. Hunto cu esaki a inclui e informacion financiero di aña 2020 pa asina por haci un comparacion. Ademas e Parlamentario por pone su pregunta y comentarionan mesora den e documento. Den e Presupuesto 2021 tambe a inclui tur consehonan diConseho Consultativo (Raad van Advies), CAFT y e contestanan di Gobierno.

Entrada y gasto

E mandatario ta informa cu Presupuesto 2021 tin un total di Entrada di1.038 miyon florin y un total di Gasto di 1.916 miyon florin. Esey ta nifica cu Pais Aruba tin un deficit di 878 miyon florin cual ta -21% di e GDP di Pais Aruba. E necesidad financiero di Pais Aruba pa e aña aki ta 1.138 miyon florin. Minister Maduro ta sigui bisa cu e cifranan aki tamustra e gravedad di e situacion financiero y e importancia di por hiba un maneho financiero serio.

Gastonan di Sosten Social y Sosten di Economia

E dignatario tambe ta presenta e gastonan pa Sosten Social y e gastonan di Sosten di Economia. Minister Xiomara Maduro ta informa cu a reserva un montante di 96 miyon florin pa e gastonan di Sosten Social, cu ta encera e gastonan di SVB y AZV. Alabes a reserva 362 miyon florin pa e gastonan di Sosten di Economia, esaki ta e gastonan di FASE, Sosten Financiero di 4.000 florin di Subsidio di Salario. E dignatario ta enfatisa cu Gobierno di Aruba ta sigui brinda e yudansa financiero aki y hunto cu e fiansanan di Hulanda lo por cubri e necesidadnan financiero te na momento cu nos economia por cuminsa draai suficientemente pa nos por haya entrada.

Gradicimento

Minister Xiomara Maduro ta gradici e funcionarionnan di Departamento di Finansa cu a traha duro pa por a entrega Presupuesto 2021 y tambe pa por a presenta un Presupuesto 2021 na un manera innovativo y mas eficiente. Alabes e mandatario a gradici tur Ministerio cu a yuda den e proceso di entrega di Presupuesto. E mandatario ta spera cu Presupuesto 2021 pronto lo por wordo trata pa Parlamento di Aruba.

9 views0 comments

Recent Posts

See All