Minister di Cultura ta felicita Roy Lints cu su ‘Gouden Kalf’


Oranjestad – Minister Xiomara Maduro ta orguyoso cu un Arubiano, Roy Lints a gana e prestigioso premio di ‘Gouden Kalf’ na Hulanda. Roy Lints miho conoci como ‘Lord Cachete’, ta trahando na Hulanda na e ‘Stichting De Nieuwe Kans’ (DNK) na Rotterdam. DNK ta un fundacion cu ta traha cu hobennan masculino di entre 18 y 27 aña di edad di varios nacionalidad cu tin diferente problema y cu mester di ayudo pa un comienso nobo.


‘De Gouden Kalf’ ta un premio cu ta wordo otorga na Hulanda na e miho produccion di peliculanan di cortometrahe, largometrahe y documentario. Durante casi un aña e productor Marina Meijer a filma e corto documentario ‘Carrousel’ na e ‘Stichting de Nieuwe Kans’ con e profesionalnan ta guia e hobennan. Segun e rapport di huradonan ‘Carrousel’ ta ‘Een uitzonderlijke documentaire waarin de maker vanaf het begin een strak verbond aangaat met de kijker door haar camerawerk. De film zit dicht op de huid en kruipt eronder. Het is onmogelijk om niet geraakt te worden’. Dia 24 di november proximo lo tin e premiere di ‘Carrousel’ na Amsterdam, Hulanda. Por mira e documentario riba www.2doc.nl


Minister di Cultura Xiomara Maduro ta felicita ‘Lord Cachete’ y henter staf y personal di DNK cu e prestigioso premio aki. E mandatario ta subraya cu ‘Lord Cachete’ ta haciendo un bunita trabou humanitario pa yuda hobennan cu problema na Hulanda y ta desea su persona hopi exito den futuro.


19 views

©2020 by Bo Informado