Minister Dangui Oduber: Un futuro briyante ta spera San Nicolas. E proyecto Baby Beach ta e comienso


ORANJESTAD – Diamars atardi Minister di Turismo Sr. Dangui Oduber a acudi na Baby Beach pa oficialmente duna inicio na e comienso di construccion di e proyecto di Baby Beach Promenade. Esaki a sosode den un ceremonia caminda e mandatario a expresa e importancia cu e proyecto aki tin pa e area di Baby Beach y su futuro desaroyonan economico pa San Nicolas.


Ainda por corda cu aña pasa na luna di november tabata tin e groundbreaking di e proyecto di Baby Beach. E espectativanan tabata halto y e tempo ey e proyecto tabata encera cu lo a amplia e beach haciendo esaki mas grandi door di yena e area cu mas santo blanco. Lo a percura pa crea mas area di parkeo, mehora e infrastructura, percura pa tin landscaping, contruccion di bañonan publico, construccion di Kioskonan y construccion di un restaurant di calidad. E proyecto original tabata un bunita proyecto cu lo tabata un balor agrega pa San Nicolas. E proyecto lo a crea empleo y stimula e economia di San Nicolas.


Sinembargo na comienso di aña 2020 Aruba a haye confronta cu un pandemia mundial y debi na esaki e proyecto no por sigui manera e tabata planea. E proyecto no tabata por a wordo financia mas manera tabata planea. Esey a haci cu mester a haci un re-diseño y trece cambion na e proyecto aki, na un manera creativo a busca e fondonan necesario pa asina aki e proyecto por a continua asina e Minister Oduber a trece dilanti.


Minister Dangui Oduber a menciona cu e contento cu e proyecto di Baby Beach ta continua apesar di tur e retonan, obstaculo y problemanan financiero ocaciona pa COVID-19. Na un manera creativo a percura pa busca e fondonan pa asina e proyecto aki por continua. E proyecto aki ta planea por wordo entrega na aña 2021. Esaki ta hopi importante pa e desaroyo integral cu Gobierno tin pa San Nicolas.


Minister a menciona cu percura caba pa drecha e 2 piernan na Rodgers Beach cu ta wordo hopi bishita. Tin hopi interes den e desaroyo di San Nicolas, recientemente a haya presentacion di un grupo cu ta interesa pa bin cu un boutique hotel na San Nicolas, esaki sigur ta cuadra cu e maneho di Gobierno caminda ta trece hotelnan chikito pero di calidad, Minister Oduber ta spera cu esaki por keda concretisa.


Por mira varios inversionnan importante tumando lugar den e sector turistico. Esaki ta muestra cu sector priva tin confiansa den nos paiz, nos economia y den e maneho di Gobierno. Hyatt a haci un inversion di 15 miyon dollar den un swimming pool pa adulto, tambe Divi Tamarijn a haci un renobacion di nan cambernan, otro inversion cuantioso. Segun Minister Dangui Oduber tur esaki nan ta desaroyonan positivo cu ta crea un spinoff effect den nos economia creando empleo.


E proyecto aki ta comienso di un futuro briyante pa e desaroyo economico y turistico pa San Nicolas.


34 views0 comments

©Bo Informado