Minister Dangui Oduber: Lusnan LED a keda instala na veld di Sport Club United


ORANJESTAD – Diahuebs anochi Minister di Deporte Sr. Dangui Oduber a haci bishita na Sport Club United na Noord, esaki despues cu e lusnan LED nobo a keda instala siman pasa. Veld di United no tabata tin iluminacion y esaki tabata sumamente necesario.

Minister Oduber su maneho ta dirigi riba mehoracion di infrastructura na veldnan y complehonan deportivo, percura pa tin bon iluminacion y tambe yerba articifial. Dentro di poco e promer proyecto di yerba artificial lo wordo entrega na veld di Kudawecha.


Pa realisa e iluminacion, veld di United a conoce trabounan di infrastructura riba e parti di electricidad, a cumpra lusnan nobo LED y e palonan di luz necesario. E trabounan aki a wordo realisa cu fondonan di entre otro Ministerio di Turismo, Salubridad Publico y Deporte y Aruba Voetbal Bond (Concacaf).


Veld di United ta conoci na Aruba pa practica e deporte di futbol y tambe sa tin competencia di hisamento di flie. Veld di United ta bira e di tres veld cu ta conoce iluminacion nobo hayando e atencion debido di Gobierno.


Deporte ta un instrumento importante pa nos pais. E ta percura pa entre otro un bida mas saludabel, tanto fisico como mental, e ta tene hobennan leu di delincuencia y ta siña nan disciplina. Sin deporte, un nacion no tin bida. Pa e motibonan aki, Minister Dangui Oduber ta haya importante pa deporte na Aruba haya e atencion debido.


Minister Dangui Oduber ta sigui cumpli apesar cu e fondonan pa deporte ta hopi limita, asina mes a haci hopi pa deporte. E mandatario a menciona cu a yuda diferente clubnan cu material, airco y iluminacionnan. Intencion ta pa poco poco drecha den tur bario caminda tin necesidad pa cu deporte. Mester menciona si cu e proyecto aki ta un proyecto andando ya di aña pasa, prome cu e situacion di COVID a presenta.


Minister Oduber kier a felicita e dirigentenan y e hungadornan di Sport Club United cu nan lusnan nobo y deseanan tur clase di exito. Finalmente e mandatario a gradici Aruba Voetbal Bond y Concacaf pa nan cooperacion pa sigur un bunita proyecto.


Minister Oduber ta demostrando cu hechos cu fondonan limita con e tin e atencion necesario pa deporte conforme su maneho y vision. Minister ta convenci cu ora tin mihor facilidadnan, mihor iluminacion y yerba artificial lo bai stimula mas mucha, hoben y adulto pa participa na deportenan na veld.


Cu entrega di otro bunita proyecto minister Oduber ta cumpliendo pa e progreso y biniestar di deporte.


0 views0 comments

©Bo Informado