Minister Dangui Oduber:

Nos kier evita tuma mas medida pero mester cooperacion di comunidad



ORANJESTAD - Como minister di salud mi mester expresa mi preocupacion awe pa e situacion actual cu tin. E no ta motibo pa panico pero si pa ta alerta.

E ta preocupante na momento cu tin mas cu 10 contagio local den apenas 2 dia.

E transmision local aki naturalmente tawata algo cu nos no tawata desea pero tanten cu covid-19 tey na mundo esaki ta keda un posibilidad semper. Despues di mas cu 2 luna y mei sin transmision local awe e situacion a cambia y ta diferente.

E proximo dianan y simanan ta hopi determinante pa nos salud y economia di nos pais. Nos como gobierno a opta pa tuma accion di inmediato pa evita cu nos mester tuma mas medida. Nos kier percura pa nos por mantene gran parti di nos economia ta draai. Nos kier evita cu nos mester tuma mas medida cu e consequencia cu nos economia lo wordo paraliza un bes mas cu tur hende sa con devastador esaki lo ta.

Nos comportacion como ciudadano y pais ta determinante con nos lo sigui padilanti. Nos kier ta hopi cla den esaki. Nos kier evita tuma mas medida.

Nos no por bai riba lockdown mas.

Nos no por bai shelter in place mas.

Nos no por bai toque di queda mas.

Tur e medidadanan aki ta hopi extremo pero si tin e urgencia y necesidad pa salvaguardia salud di nos hendenan nos lo mester hacie y no lo duda. Salud ta keda na prome lugar pero nos ta keda busca e mihor balansa entre salud y economia. Nos ta consiente cu e medidanan tuma ayera ta afecta algun sector di nos economia pero e ta necesario pa evita medidanan mas drastico cu lo afecta TUR sector di nos economia.

Desde awe nos mester ta mas alerto. For di prome cu nos a dicidi di habri nos fronteranan nos a traha riba nos opschalingsplan. Esaki ta e plan cu ta determina ki ora ta necesario pa cuminsa tuma decisionan pa preveni cu tin mas contagio y pa limita e riesgo di contagio. Naturalmente nos kier evita cu nos mester tuma medidanan drastico pero nos no lo duda pa tuma accion si tin e necesidad.

E opschalingsplan ta wordo determina pa 8 parameters.

1. Capacidad di ICU

2. Capacidad di NON-ICU

3. Cantidad di casonan activo

4. Cantidad di areanan di isolacion y quaraintaine

5. Cantidad di capacidad di test na Lab HOH

6. Capacidad di intake y contact tracing capacity

7. Cantidad y capacidad di swabs pa dia

8. Origin di infeccion

Un di medidanan cu nos a tuma ta pa fuertemente recomenda e uzo di mask den areanan caminda no por mantene distancia di 1.5M meter.

Si bo ta bai den contacto cu un persona cu tin covid-19. Por ehempel si den un cas tin otro persona contagia cu ta isola.

Tur profesion cu no por mantene 1.5 meter di distancia; por pensa riba caheronan, dunadornan di cuido, waiters, trahadornan social.

Den tur area publico manera supermercado, oficinan sera, misa, tiendanan, restaurant. Cu otro palabra turnestabliciemnto of oficina paden cu airco.

Tur persona riba 60 anja di edad.

Tur persona cu tin un condicion fysico manera diabeticonan, hendenan cu tin problema cu curason, problema pulmonar, cancer.

Tur persona den transporte publico.


Ta hopi importante pa tur hende bira consiente cu covid ta den nos comunidad.

Nos mester tin e disciplina awor pa evita cu mas hende ta wordo contagia.

E ta den nos man con nos ta sigui e proximo dianan y simanan nos dilanti.

Nos mester sigui e protocolnan.

Sigui mantene distancia.

Sigui laba man continuamente.

Sigui guidelines.

Ban nos tur hunto percura pa e disciplina cu ta asina importante pa mantene nos economia habri y evita cu Covid-19 ta sigui plama den nos communidad. Ban pensa riba esnan vulnerabel y ban cuida nan. Cuida bo mes, sea responsabel, demostra disciplina y cuida bo famianan y sernan keri. Percura pa hiba un bida saludabel, haci ehercicio, come saludabel y boost bo systema immunologico.

Nos mester maneha Covid y no laga Covid maneha nos.


181 views0 comments

©Bo Informado