Minister Dangui Oduber:

Ta anuncia renobacion di e pista di BMX y como tambe e playground di Parke Curason na Jaburibari.



ORANJESTAD – Diamars mainta Minister di Deporte Sr. Dangui Oduber tabata na Parke Curason na Jaburibari caminda e mandatario a anuncia cu hunto cu e bestuur di Fundacion Facilidadnan Depertivo (FFD) a inverti den un speeltuin completamente nobo pa e parke. Tambe e mandatario a anuncia cu como Gobierno su persona ta compromete su mes cu lo bay percura pa cuminsa drecha e rampa di e pista di BMX.

Segun Minister Oduber e speeltuin den e proximo simannan nos dilanti lo wordo arma, esaki ta hopi bon pa e muchanan cu ta acompaña nan mayornan ora di bay haci ehercicio. Pa locual ta e pista di BMX e mandatario a expresa cu esaki lo bay tuma un inversion substancial, lo cuminsa na drecha e rampa prome pero e idea ta pa drecha esaki den su totalidad. Tambe Minister Oduber a menciona cu tin un masterplan riba mesa cu lo percura pa drecha henter Parke Curason. Apart di e pista di BMX y e speeltuin e parke tin un cancha di basketball, area pa cana y core, tin e cancha di futbol y tambe area pa practica skateboard. Tur esaki ta den palabracion cu FFD.

“Lamentablemente den transcurso di aña nuin di esakinan no a haya e mantencion necesario y pa e motibo ey nos ta hibando un discusion pa añanan largo cu Fundacion Lotto Pa Deporte (FLPD) paso nos ta convenci cu mester tin e boluntad pa duna deporte mas placa” tabata palabranan di e mandatario.

E mandatario a menciona cu actualmente mes tin un discusion entre Stichting Sportsubsidie Aruba (SSA) y FLPD pa motibo cu FLPD na e momento nan aki debe SSA 1.5 miyon florin segun nan acuerdo. Ta asina cu FLPD a acorda 3 aña pasa cu nan lo traspasa SSA 4.5 miyon florin pa aña. FLPD a traspasa solamente 4 miyon floin pa aña pues a keda debe SSA 500 mil florin pa aña cu ta haci e debe 1.5 miyon florin. Segun Minister Oduber si tabata tin e 1.5 miyon extra lo por a drecha diferente veldnan. Por ehempel compleho deportivo Frans Figaroa y Stadion Guillermo Prospero Trinidad cu actualmente ta afgekeurd door di FIFA pa tene weganan international debi na falta di mantencion.

Deporte ta hopi importante pa nos comunidad y den e tempo di COVID esaki a keda demostra con importante ta pa haci ehercicio y participa activo na un deporte pa cuida bo salud. Minister Oduber a menciona cu como Gobierno ta su deber pa stimula tur cuidadano su participacion na deporte. E mandatario ta convenci cu tur e inversionnan cu ta bin ta hacienda durante e añanan apesar cu tin limitacion na fondo. Door di e resistencia cu Gobierno a ricibi di Canadian Bank Note y FLPD pa por contribu mas na deporte a haci locual tabata por y awe ta anuncia cu ta bay drecha e pista di BMX y un speeltuin completamente nobo asina e mandatario a trece dilanti.

Minister Dangui Oduber ta sigui traha y ta sigui haci su esfuerzo pa deporte. Un Minister cu tin curason pa nos deporte cu ta traha incansablemente pa yuda deporte.


12 views

©2020 by Bo Informado