“Mi ta boga pa un cambio fundamental den nos sistema di enseñansa”



Aruba y mundo a confronta un pandemia cu tabatin y ainda tin efecto riba enseñansa. E

examennan di enseñansa secundario ta casi completamente tras di lomba y mi kier a felicita tur hoben cu a pasa nan examen cu exito. Esnan cu ainda tin e oportunidad di haci esaki, tambe mi kier a deseanan tur clase di exito. Esnan cu mester ripiti e aña di examen, tambe mi kier a deseanan exito durante e proximo aña escolar. Keda sin pasa e aña y specificamente e aña di examen, no ta facil pa e hoben y sigur no ta motiva nan tampoco.

Den e proximo simannan nos hobennan lo haya nan ultimo rapport pa mira si nan lo continua den e nivel di enseñansa secundario cu nan ta aden actualmente, of si nan tin cu ripiti un aña completo of nan ta pasa pa e siguiente aña. E ultimo aki ta conta tanto pa enseñansa basico como secundario.


ENSEÑANSA ANTICUA DEN SIGLO 21

Nos ta biba den siglo 21, pero ainda nos sistema di enseñansa ta di medio siglo 18 te cuminsamento di siglo 19. Den e periodo aki industrialisacion tabata un exito pa e ser humano. E formato di fabrica tabata exitoso y e tempo ey e paisnan desaroya den Europa y Merca a aplica e mesun formato di fabrica den enseñansa. Sinembargo hopi filosofo y cientifico riba e area di enseñansa desde e tempo ey caba a demostra cu e muchanan/hobennan no ta un producto di fabrica, pues e formato aki no lo yuda mayoria di e studiantenan desaroya nan potencial. Anto, na entre otro Aruba, ainda nos ta aplica e formato aki di siglo pasa den siglo 21.


NIFICACION DI ENSEÑANSA DEN SIGLO 21

Esaki ta nifica cu Aruba mester trece e cambionan fundamental den e sistema di enseñansa y acerca e cambio aki den un forma sistematico cu participacion di mayoria actor, cu tin relacion directo of indirecto cu enseñansa, pa por cumpli cu e demanda di siglo 21.

Si nos kier pa e mucha y hoben desaroya pensamento critico cu ta un habilidad di siglo 21, nos docentenan mester brinda e oportunidad aki pa nan por desaroy’e. Un ehempel ta, cu e studiantenan mester ta mas envolvi cu y ta activo den henter e proceso di siñamento. Bon bisa, e studiante mester por studia den su propio idioma materno. Mester evalua e studiante den e proceso di siñamento, pa e por mehora su competencianan y no unicamente aplica un evaluacion apart durante un momento den siman. Tur esaki ta yuda e studiante desaroya su pensamento critico. Sinembargo nos scolnan y specificamente nos cabesantenan y nos maestronan mester haya e oportunidad husto tambe pa profesionalisa y adkiri e competencianan necesario, pa por cumpli cu e exigencianan relevante, pa siña e studiante e habilidnan di siglo 21.


MEP Y ENSEÑANSA

Pa motibo aki partido MEP ta boga pa e cabesantenan y e maestronan sigui e programanan di profesionalisacion, pues inverti den e capital humano, pa por haya mas herment pa cumpli cu e criterianan ariba menciona. Banda di esaki partido MEP den Parlamento di Aruba lo propone cambio den cierto articulo den diferente ley di enseñansa, pa brinda espacio na e scolnan y nan directiva di scol, pa por stimula cambio real den enseñansa y na mesun momento stimula responsabilisacion den e proceso di innovacion. Ademas MEP den e proximo gobernacion lo percura pa e scolnan, mediante nan respectivo directiva haya e guia necesario, door di expertonan local, pa por implementa innovacion y aplica diferente cambio den scol. Naturalmente e proceso di cambio ta diferencia di scol pa scol; “One Size Does Not Fit All!!!”.

Mester keda dialoga cu veld y inclui nan den henter e proceso di cambio. Asina por sigui menciona e puntonan relevante di nos programa di partido, cu lo stimula mehoracion di calidad di enseñansa y cumpli cu por ehempel e meta 4 di e metanan di desaroyo sostenibel di UNESCO. Ta p’esey dia 25 di juni mi persona ta conta cu bo sosten y pa asina hunto cu bo, nos sigui avansa.



10 views0 comments