“Mester wak hopi bon e decisionnan cu ta tuma den e lunanan nos dilanti”


ORANJESTAD – Como miembro di e delegacion organisado di e sesion di brainstorm ‘Turismo den Perspectiva’, Parlamentario pa Partido di Pueblo Aruba (AVP) Jennifer Arends-Reyes ta califica e ponencia di tur e sectornan invita como sumamente valido “y ta yuda crea un bista di loke nan experiencia y ki recomendacion nan tin.”


E mas reciente edicion cu a enfoca un biaha mas riba e industria principal di nos isla, a tuma luga diahuebs ultimo den Renaissance Convention Center. Otro stakeholders invita y presenta tabata Aruba Timeshare Association (ATSA), Divi Resorts, Federacion di Trahadornan di Aruba (FTA) y varios compania di servicio di taxi.


Despues di e presentacion di cada panelista, e delegacion di AVP tin oportunidad di haci pregunta y/of comentario riba e ponencianan haci. E dialogo aki ta busca pa conoce e perspectiva di tur stakeholders riba turismo, economia y e mercado laboral.


Por ehempel, den e caso di flexibilisacion di leynan laboral cu sector priva ta solicita, pero sindicatonan no ta wak e necesidad, Parlamentario Arends-Reyes ta di opinion cu mester evalua e scenario den cual Aruba ta recupera mas lihe ya cu Aruba ta keda como un destino popular pa e mercado Mericano. Por tin desaroyo positive cu ta surpasa e proyeccionnan si Aruba keda profila como un opcion cu ta safe.


“Ta keda na comunidad pa nos cumpli cu e parti di protocol estrictamente, y na otronan pa mantene gastonan abou y asina recupera na un stap mas lihe di loke a spera,” Arends-Reyes a indica. Otro miembronan di e delegacion di AVP den e organisacion di e encuentronan aki ta lider mr. Mike Eman, mr. Gerlien Croes, mr. drs. Richard Arends y drs. Gervais ‘Rene’ Herde. Parlamentario Arends-Reyes a confirma cu e sesionnan lo continua den e simannan nos dilanti pa cubri otro sectornan di nos pais.


3 views0 comments