Mester traha riba sentido di siguridad den nos comunidad awor!


Ta impactante tuma nota di locual a sosode den e ultimo cinco dianan tras di otro. Cuatro caso serio di tiroteo caminda uno a resulta fatal. Preocupacion inminente y sentimento di inseguridad ta reina full rond den nos comunidad.

For di principio y kedando semper den e mes un pensamento, un parlamentario mester ta critico den e tarea pero no sinta critica y tira culpa, cual tabata e forma tradicional di hiba politica. Ta cuestaiona si y na su luga, e forma di procede di e minister actual pa trece pas y solucion.

Sospechosonan di actonan castigabel manera entre otro, ta den posecion di arma di candela y haci uzo di esaki, ta delitonan pisa y grave. E personanan aki na ningun momento lo para keto y puntra ta ken ta e minister di husticia na e momento ey prome cu actua y los tiro, ta locual cu Robert Candelaria a declara.

E intencion nunca tabata di su banda, di forma parti di un grupo cu ta sinta y critica so pero dedica y para na banda di esnan cu lo trece solucion na bienestar di comunidad.


Locual cu Candelaria a afirma ta cu pa trece solucion, tin cu trece un balansa den nos husticia entre accion preventivo y accion curativo. E no mester ta algo cu ta keda papia riba dje, ta algo cu mester haci y cu accion decicivo. Husticia tin cu traha den un balansa pa y cu e comunidad cu ambos man. Esun duro di autoridad y e otro di compacion pa nos prohimo.

Robert Candelaria ta di opinion cu ley y maneho di husticia mester cambia pa ta na beneficio di un y tur. Mas cu claro pa sirbi interes general. Hende mester cuminsa haya respet bek pa nan mes, pa ley y pa nos comunidad pa asina logra surpasa e desbalance cu ta biba den nos na e momentonan aki.


E ta un realidad cu ningun mayor, wela y welo, primo of tanta no kier ta testigo y mira nan ser keri den mal caminda. Na momento cu esaki tuma luga, hopi ta esnan cu no sa ni con pa yuda nan mes, mucho menos duna un man pa yuda nan ser keri cu a perde caminda. E sufrimento ta grandi y tur kier yega na solucion.

E ta un tristesa di mira yiunan cu bay den mal caminda, tuma e caminda di adiccion, di gang y criminalidad, lagando famia den agonia sin midi consecuencia di nan actonan den bida. Gran mayoria cu problema emocional y of mental cu lo mester di tratamento mientras nos tin un insituto Respaldo cu man yen y un lista di espera largisimo.

Kiko por wordo haci: Traha hunto!

Ta na beneficio di e comunidad pa mira gobierno facilita e oportunidad pa fundacion, iglesia y otro organisacionnan traha hunto y duna un man den prevencion. Mester preveni activamente y no papia unicamente di prevencion sin ehecuta esaki.


Legalisacion di droga no por tuma luga!

No por scohe pa legalisa marihuana y na mes momento bisa cu nos kier e criminalidad baha y nos yuinan tuma e bon caminda. Adiccion ta e problema principal den cualkier hogar cu ta sufri na man di droga. Mester tene na cuenta cu droga a drenta scol, te hasta nos scolnan basico.


Espacio y sosten na rehabilitacion

Rehabilitacion di esnan cu cay den man di husticia ta necesario. Victimanan mester di guia y yudansa y pa logra esaki ta rekeri cambio di ley y maneho.


Duna Centro Orthopedagogico ( OC ) su balor!

Proyecto extraordinario di e gobierno anterior di Mike Eman cu ta e Centro Orthopedagogico ta un bibo ehempel. Ex minister Dowers a laga un bon proyecto atras cu mester a sigui traha riba dje y lag’e crece y mehora pa por yuda den correccion di nos hobennan cu mester e extra disciplina y guia. No por laga e proyectonan aki bay perdi. Comunidad mester siña di ta brasa habri pa ricibi e hendenan cu a comete eror bek, recupera y dispuesto pa reintegra, despues cu nan a sinta nan castigo.


Deporte mester ta un partner den e lucha aki!

Programa pa hoben y deporte den bario ta necesario pa regresa y aporta na e lucha contra adiccion. Laga e hoben mira cu deporte no ta just leuk, pero e tin potencial enorme pa yuda den nan bida y aporta na disiplina. En cohunto cu organisacion internacionalpa promove nos deporte y hibe na nivelnan mas halto. Engrandece e oportunidad y nos nomber Aruba den exterior.


Norma y balor!

Enfoca riba norma y balor atrobe caminda famia ta haya prioridad y yuda lanta hobennan cu respet den nos comunidad.


Skerpene!

Instituto Skerpene antes a forma hopi hende cu a crece, reforma y bira adultonan productivo den nos comunidad. Laga nos traha pa e Orthopedagogisch Centrum haya e luga ey awor unda ta duna guia spiritual, psychologico, formacion di trabou y diciplina na esnan cu no a logra haya esaki na cas.

8 views0 comments