MAS DIALOGO, TRANSPARENCIA Y COHERENCIA DEN MANEHO DI COVID TA NECESARIO


Despues di a analisa e resultado di e consulta cu expertonan durante encuentro Brainstorming Covid-19 y discuti esaki internamente, AVP a yega na un serie di recomendacionnan cu por contribui na mehoracion di e combatimento di COVID-19.

Lider di Partido, mr. Mike Eman y parlamentario Mervin Wyatt Ras a discuti esakinan tambe cu diferente sector medico y gremio despues cu a presenta e relato final di e Brainstorming den forma di un rapport: Covid-19 den Perspectiva.

Den e conclusionan ta resalta entre otro tambe e nececidad pa mas dialogo y consulta cu comunidad ora di tuma medida y tambe e nececidad pa mehora transparencia y coherencia di informacion na comunidad.


E rapport ta bisa:


Dialoga y envolvi gruponan den comunidad ora considera tuma medida

  • Envolvimento di (organisacionnan den) nos comunidad ora ta considera tuma cierto medida, ta hopi importante pa e calidad y acceptacion di e desicionnan cu gobierno ta tuma.

Entre otro por pensa pa regularmente haci uzo di entrevista cu gruponan di enfoke of un hearing y dialogo riba temanan relevante pa combatimento di e crisis. Tambe por considera introduci un liña di telefon of website unda publico por yama of bishita pa haya informacion of duna tip y sugerencia.


Pa locual ta trata e nececidad pa mehora e communicacion cu comunidad e rapport di AVP ta bisa:


Mehora transparencia y coherencia di informacion

  • Di parti di e autoridadnan envolvi mester duna splicacion transparente, completo y basa riba echo tocante e motibonan pa tuma cierto decision; specialmente si ta toca medidanan cu ta limita e mobilidad di persona of tin efecto negativo riba actividad economico. E medidanan mester ta coherente y si tin cambio den maneho mester splica y hustifica esaki na un manera honesto y cu tur hende por compronde.

Internacionalmente y na Aruba tabata tin demasiado ambivalencia den recomendacion di uso di tapaboca. Cientificamente a keda suficientemente proba cu uso di tapaboca ta reduci e transmision di e virus. E uso ta lanta tambe un conscientisacion permanente cu nos tin un menasa di un virus. Ta importante pa defini y comunica mas cla y specifico e areanan y momentonan cu e uso di tapaboca ta obligatorio tanten cu nos no tin un vacuna pa e virus.

Importante ta tambe pa evita “good news show” cu ta baha e conscientisa-cion di comunidad: e menasa di e virus y su peligernan ta continuamente presente, sigur ora nos fronteranan ta habri.

Lider di Partido, mr. Mike Eman y parlamentario drs. Mervin Wyatt Ras a infatisa e puntonan aki tambe despues di nan segundo buelta di consulta tambe. Pa Eman y Wyatt Ras a resalta cu e temanan aki a worde sinti tambe den un of otro forma como un punto cu mester haya modificacion y atencion den e maneho actual di Covid-19.


6 views0 comments