MAS DI 4 MIL CIUDADANO DI NOS PAIS A REGISTRA



Dialuna 22 di februari 2021, dilanti wowo di prensa y Live via television nacional, Prome Minister Evelyn Wever-Croes a tuma e vacuna contra Covid na Centro Deportivo Libertador Betico Croes. Hunto cu Prome Minister, Minister di Salubridad, Dangui Oduber y Minister di Finansa, Xiomara Maduro tambe a tuma e vacuna.

Prome Minister a expresa cu su preferencia lo tawata pa warda riba su turno segun plan di vacunacion di DVG y e gruponan di enfoke. Sinembargo a evalua e cifranan di esnan cu a registra, especialmente e grupo di enfoke di 60 aña pariba. E percentahe di registracion di e grupo aki tawata hopi abou loke a pone Gobierno dicidi pa intensiva esfuersonan di conscientisacion.

“Mi a tuma e vacuna na e forma mas transparente posibel, dilanti prensa y Live na television nacional pa asina trankilisa e critica y cuestionamento cu tabata tin ‘pakico Minpres no a tuma e vacuna ainda’. Ami a tuma e vacuna, abo ta cla pa tum’e?”.

Cu vacunacion di 3 minister, esaki a wordo logra tambe. Despues cu e ministernan di Gabinete Wever-Croes a vacuna dialuna atardi dilanti prensa presente y Live na television nacional, mas di 4 mil ciudadano di nos pais a registra. Cifranan te cu diamars 23 di februari, ta indica un total di17.157 persona registra di cual mas di 7 mil ta ciudadanonan di 60 aña pariba.

Prome Minister ta gradici Aruba y esnan cu a duna oido na yamada di Gobierno di Aruba pa registra pa vacuna. Ban sigui recomenda y stimula nos grandinan pa registra y tuma e vacuna. E meta ta pa recupera nos pais bek. Ta hopi hende ta sufriendo na man di Corona Virus y aworaki ta momento pa cuminsa pensa riba recuperacion di nos Pais. Aruba mester di cada un di nos.

Pa esnan cu no a registra ainda, por fabor registra na e app Aruba Health. Unico cos cu bo tin mester ta bo number di AZV y den algun minuut bo ta cla. Registra, pa bo por wordo vacuna contra COVID-19! Download e app Aruba Health; http://aruba.dvgapp.org.

4 views0 comments