Lider di AVP, mr. Mike Eman:

No por warda riba mundo pa recupera, nos mester di iniciativanan hopi mas pro-activo y dinamico pa sali afo



ORANJESTAD – For di algun luna caba Partido di Pueblo Arubano (AVP), bou liderazgo di mr. Mike Eman, a bin ta sostene asina yama sesionnan di brainstorming riba e diferente aspectonan cu ta afectando nos pais. Mas reciente a conclui e ultimo di dos sesion enfoca riba turismo caminda a participa sectornan hotelero, comercial y sindical, entre otro. E obhetivo ta pa conoce e perspectiva di cada sector riba e retonan pa cu turismo, economia y mercado laboral, ademas di scucha cu ta nan recomendacion pa un recuperacion rapido y efectivo. Reflexionando riba tur loke a scucha, mr. Eman a comparti su conclusionnan cu solamente atrabes di un dialogo, trahando hunto y atrabes di iniciativanan dinamico, por recupera Pais Aruba pa hiba na un posicion ainda miho di loke e tabata prome cu crisis di COVID-19.


“Nos tin un reto hopi grandi na e momentonan aki. Nos ta bibando den periodo di un crisis nunca bisto. Nos tin miles y miles di hende sin trabou. Nos por a tende di tanto sindicato, como doño di trabou, cu ta teme cu otro aña hopi retiro lo cay, hopi condicionnan adicional lo bin riba entrada di e trahado cu conscuencia di mas reduccion pa entrada di famia. Aruba no por warda riba un recuperacion mundial. Nos ta tende e diferente instancianan oficial ta duna pronostico cu Aruba cu ta biba 80% di turismo lo bai conoce recuperacion totalmente dependiente di locual tin na recuperacion universal cu introduccion di un vacuna. Es decir cu e planning di autoridadnan ta basicamente pa warda riba recuperacion mundial pa nos recupera simultaneamente cu mundo. Opinion di e lider di AVP, mr. Mike Eman ta cu Aruba no tin e espacio pa warda riba e ritmo di recuperacion mundial. Esey ta bay ta un periodo demasiado largo, nos mester iniciativanan hopi mas pro-activo y dinamico pa nos por sali afo.”


E ex Prome Minister di Aruba ta kere cu mester a drenta di biaha den dialogo cu Merca, of por lo menos e area Noroeste di Merca pa purba crea un asina yama ‘Bubble Agreement’ mescos tin actualmente entre New Zealand y Australia. E acuerdo aki ta permiti e trafico di persona y asina garantisa un recuperacion mas rapido. Eman ta hopi preocupa pa tende cu tin e pensamento eyfor ta resona indicando cu e recuperacion di Aruba lo mester bay na costo di e posicion huridico di e trahador. Gobierno lo ta den deliberacion cu Hulanda riba esaki bao di e titulo “flexibilisacion di mercado laboral”.


“Nos no ta kere cu e proteccionnan cu nos trahadornan tin a stroba Aruba di crece,” mr. Eman ta bisa. “Prome cu tabatin COVID-19, prome cu tabatin tur e medidanan cu a bin lamentablemente entre 2017 cu 2019, nos tabatin un isla cu un economia creciente, cu hopi perspectiva positivo pa futuro y e leynan laboral no a stroba Aruba di desaroya economicamente, crece grandemente.” Hotelnan mes a bisa durante e dialogo cu nan a crea reserve den e period cu cos tabata bay bon; reservanan cu nan ta usando pa tene cabes riba awa. E condicionnan cu nos a crea tabata duna suficiente espacio pa hotelnan por crece, inverti; sin cu mester papia di kita di empleado. Al contrario nos ta kere cu mas cu nunca gobierno, empleado y doñonan di trabou mester bay na mesa pa mira con nos por bay yega na un reparticion mas husto di e entrada cu nos ta bay ta alcansando un bes cu nos recupera e economia di Aruba.”


Durante e sesion mr. Eman a conta con a siña hopi di taxistanan riba con pa mehora e satisfaccion di e turista cu ta bin Aruba. Tambe a tende di sindicatonan y doñonan di trabou. Asina ta formula pensamentonan cu no solamente tin ingredientenan basa riba experiencia, pero ta crea tambe un “dragvlak” pa ideanan nobo. “Esey ta loke nos ta invirtiendo den dje cu nos tempo y cu brainstorming y dialogo; pa tin un plan y un vision pa recuperacion di Aruba,” e lider di AVP a finalisa bisando.


20 views0 comments