Ley di Ombudsman a keda aproba unanimamente.


Sigur awe tabata un dia hopi importante den sala di Parlamento. Un culminacion di añanan di trabou di diferente ex miembro y miembronan actual di Parlamento pa loke ta trata e Landsverordening Ombudsman. 

Ami sigur ta contento di ta forma parti y por a aporta na e Bijzondere Commissie Ombudsman cu awe a presenta e iniciativa di ley aki cu a keda aproba.

Actualmente Aruba ta e unico pais den Reino cu no tin un Ombudsman. 

Un Ombudsman ta un defensor di pueblo. Un institucion cu lo brinda proteccion na pueblo y nos muchanan. Un caminda cu un ciudadano por acudi ora cu e ta sinti su mes prehudica of cu su derechonan no ta keda respeta door di Gobierno, instancianan semi-gubernamental y otronan cu lo cay bou di e ley aki. 

Ombudsman of e Defensor di Pueblo ta un institucion independiente y imparcial. E Defensor di pueblo mester evalua kehonan encuanto diferente aspecto di e aparato gubernamental y semi-gubernamental. E mester defende e interes di e ciudadano y supervisa e calidad di e servicionan publico den un pais. Cu otro palabra E Defensor di Pueblo lo yuda comunidad investigando nan keho y of denuncia. Alabes E Defensor di Pueblo ta pa yuda e aparato gubernamental pa mehora nan proceso y proceduranan basa riba e resultado di su investigacionnan y informacion adkeri.

Pesey mes E Defensor di Pueblo lo mester tin un enfoke proactivo pa ta den contacto cu publico en general y trata tur keho of denuncia cu e ricibi cu atencion cuidadoso y cu respet.

Haci E Defensor di pueblo un realidad ta un di e metanan proponi den e acuerdo di gobernación di Gabinete Wever-Croes mirando cu e ta fortifica nos estado di derecho y ta aporta na bon gobernacion.

Mirando cu e fondonan necesario tambe a keda aloca den presupuesto 2020 di Minister President, Sra. Evelyn Wever-Croes, pronto Aruba tambe lo tin su Defensor di Pueblo. Sigur un logro grandi pa nos pais. 


10 views0 comments

©Bo Informado