Kambio di Presidente di Hunta di Komisario di Stichting Monumentenzorg Curaçao



Despues di 10 dies aña ku Sr. Marcel van der Plank tabata presidente di Hunta di Komisario di Stichting Monumentenzorg Curaçao, el a baha komo tal pa motibu ku estatutonan di e fundashon ta stipulá un edat máksimo pa e funshon. Komisarionan, gerente i empleadonan di e fundashon ta masha agradesido na Sr. Van der Plank pa tur e añanan ku el a traha duru i sin interes personal pa e fundashon i su meta prinsipal, esta preservashon di monumentunan di Kòrsou. Sr. Herbert van der Woude a bira e presidente nobo di Hunta di Komisario. Sr. Van der Woude tabata gerente di Kooyman B.V. te ku fin di 2020, ora el a baha ku penshun. Pa algun tempu kaba e ta komisario den e hunta.


Sobrá miembronan di hunta di komisarionan ta: Sr. Emauro Scoop, Sr. Lyongo Juliana, Sra. Saskia Lans i Sra.Yevchencka Martina. Sr. Marcel Dennert ta gerente di e fundashon Monumentenzorg.


Stichting Monumentenzorg Curaçao ta eksistí for di aprel 1954 i e ta un fundashon independiente (pues e no ta un fundashon di gobièrnu). Su meta prinsipal ta pa preservá nos patrimonio kultural ku ta konstruí (monumentunan) komo herensia pa komunidat.


Durante e añanan ku Sr. Van der Plank tabata presidente, Stichting Monumentenzorg Curaçao a restourá un kantidat di monumentu, por ehèmpel Landhuis Klein Santa Martha i Stupi Haltu na Roodeweg (banda di Kranshi), Bonairestraat 27, Molenplein 7-11, L.B. Smithplein 12-14 i Huize Sebastopol na Sebastopolstraat (tur na Otrobanda). Ademas a kumpra diferente edifisio na Gasthuisstraat i Pietermaai di lokual nan restaurashon ta den e fase inisial.


Poko tempu pasá a kumpra tres edifisio den Consciëntiesteeg, entre otro esun ku tabata konosí komo La Moda de Paris. Tur ta den hopi mal estado. Un di nan a keda sendé na kandela durante disturbionan di yüni aña pasá. Miéntras tantu a sòru pa su konstrukshon ta stabil pa e no por deteriorá mas. La Moda de Paris i e kas su dilanti ámbos a basha abao parsialmente komo konsekuensia di yobida fuerte fin di aña pasá. Aworaki ta trahando duru pa konservá sobrá di e edifisionan pa despues por restourá nan.


En total Monumentenzorg a optené mas ku 125 propiedat, kual e ta mantené, hür i manehá.

Monumentenzorg su meta tambe ta pa konsientisá pueblo di e importansia di nos monumentunan ku ta forma parti di nos historia. E fundashon ta hasi esaki pa medio di publikashon dibuki i foyeto. Tambe e ta produsí pelíkula kòrtiku. Un ehèmpel ta e buki digital pa mucha ku ta karga e título “Kucho den hanchinan di Otrobanda”, ku resientemeente asta a gana dos premio kultural.

9 views0 comments